Mámleketimiz basshısı jıynalǵanlardı jaqınlasıp kiyatırǵan Ǵárezsizlik bayramı menen qutlıqlap, qaraqalpaq eline joqarı húrmet hám itibarın bildirdi.

– Sizler menen birge úlken jumıslardı basladıq. Hár bir aymaqtıń dártin tıńlayıq, hár bir insannıń ishine kirip barayıq, erteńgi kúge isenimin oyatayıq, dep úlken reformalardı ámelge asırmaqtamız. Adamlar erteń emes, alıs keleshekte emes, al búgin jaqsı jasawı kerek,– dedi Prezident.

Usı siyasattıń nátiyjesi Qaraqalpaqstanda da ayqın sáwleleniwin tapqan.

Aralboyı xalqınıń turmısın jaqsılaw haqqındaǵı sózler 50 jıllardan berli  bar gáp. Biraq, sońǵı eki jılda islengen jumıslar óz aldına.

SHavkat Mirziyoevtiń baslaması menen BMSH qatnasında Aralboyı regionı ushın kóp sheriklik tiykarındaǵı Trast fondı dúzildi. Ózbekstan Respublikası Prezidenti janındaǵı Aralboyı xalıqaralıq innovaciyalıq orayı, Aralboyında innovaciyalardı qollap-quwatlaw fondı shólkemlestirildi. Teńizdiń qurıǵan ultanında qorǵaw toǵayzarlıqları, Ámiwdárya deltasında kishi suw basseynleri qurılmaqta.

Mámleketimiz basshısınıń 2017-jıl 28-fevraldaǵı qararına muwapıq Moynaq rayonın sociallıq-ekonomikalıq rawajlandırıw hám xalıqtıń bántligin támiyinlew boyınsha da bir qatar jumıslar ámelge asırıldı.

Prezidentimizdiń ótken jılı 15-noyabrdegi saparı waqtında belgilengen wazıypalar tiykarında húkimet baǵdarlaması qabıl etildi. Rayon orayında mámleketlik xızmetler orayı, amfiteatr, basseyn, sport zalı, muzıka hám kórkem óner mektebi, medicina mákemesi hám basqa da obektler qurıp pitkerildi. 20 kóp qabatlı turaq-jaylar qurılmaqta.

SHın júrekten bolıp ótken ushırasıwda Nókis qalası hám barlıq rayonlardan kelgen wákiller Moynaqtaǵı ózgerislerge háwes etkenin atap ótip, ózleri jasap atırǵan orınlardaǵı kemshilikler menen áhmiyetli máselelerdi ayttı. Olardı sheshiw boyınsha juwaplı basshılarǵa tapsırmalar berildi.

– Úlken imaratlar, zamanagóy texnikalar menen maqtanıw kerek emes. Aqıllı, bilimli, pidayı perzentlerdi tárbiyalasaq hám olar Watanımızǵa xızmet etse, eń úlken baylıq, baxıt mine, usı boladı, – dedi mámleketimiz basshısı.