Húrmetli Prezidentimizdiń 2024-jıl 30-dekabrde “Awıl xojalıǵı maydanlarındaǵı qosımsha imkaniyatlardan paydalanǵan halda ónim jetistiriwdi kóbeytiwge baylanıslı is-ilajlar haqqında”ǵı PQ-465-sanlı qararı tiykarında atız shetlerine, kanallar, kollektor-drenaj tarmaqları átirapındaǵı maydanlarǵa eksportbap eginlerdi egiw áhmiyetli wazıypa etip belgilendi.

Usı qarardan kelip shıqqan wazıypalardı, sonday-aq, «Kámbaǵallıqtan párawanlıqqa qaray» baǵdarlamasınıń orınlanıwın támiyinlew maqsetinde jumısshı topar baslıǵı – Ózbekstan Respublikası Ósimlikler karantini hám qorǵaw agentliginiń direktorı Ibrohim Ergashev basshılıǵında Xojeli rayonındaǵı “Samankól”, “Qumjıqqın”, “Ámiwdarya” hám “Kún nurı” máhálle turǵınları ushın kórgizbeli seminar shólkemlestirildi.

Seminarǵa rayon hákimi J.Ermashev, tiyisli tarawlar qánigeleri, máhálle jetiligi wákilleri hám aymaq turǵınları qatnastı. Sózge shıqqanlar “Bir máhálle – bir ónim” principi tiykarında eksportbap awıl xojalıǵı ónimlerin jetistiriw, saqlaw, qaqlaw, ıssıxanalardan nátiyjeli paydalanıw hám sol arqalı xalıqtıń dáramatların arttırıw zárúr ekenligin atap ótti.

Bul jumıslardı baslap jiberiw maqsetinde biriktirilgen wákil I.Ergashev tárepinen aymaq turǵınlarına jaqınnan járdemler kórsetildi. Atap aytqanda, máwsim dawamında jámi 100 mıń dana shiye nállerin jetkerip beriw rejelestirilgen bolıp, búginniń ózinde 10 mıń túp shiye nálleri, bel, ketpen, shelek hám basqa da is quralları biypul tarqatıldı.

Bunnan soń nállerdi durıs egiw hám tárbiyalaw boyınsha kórgizbeli tárizde túsindirilip, jaqsı niyetler menen náller otırǵızıldı.