Shomanay rayonında sharwashılıq hám túyeshilik baǵdarında media-tur shólkemlestirildi
Shomanay rayonı hákimligi tárepinen rayondaǵı sharwashılıq hám túyeshilik jumısın keń jámiyetshilikke tanıstırıw maqsetinde media-tur shólkemlestirildi.
Onda ǵalaba xabar quralları wákilleri, taraw qánigeleri hám juwapker basshılar qatnastı.
Media-tur dawamında qatnasıwshılar mal baǵıw, olardı azıqlandırıw sharayatları, jetistirilip atırǵan ónimler hám olardı bazarǵa jetkerip beriw procesi menen jaqınnan tanıstı. Sonday-aq, azıq tayarlaw, násildi jaqsılaw hám sharwalardıń den sawlıǵın qadaǵalaw boyınsha ámelge asırılıp atırǵan jumıslar haqqında tolıq maǵlıwmatlar berildi.
Media-turdıń dáslepki mánzili “Qarabaylı” mákan puqaralar jıyını aymaǵındaǵı “Sultan bereketli sharwa” fermer xojalıǵı bolıp, bul jerde 2020-jılı Avstriyadan 27 bas “Simmental” násilli qaramallar alıp kelingen. Házirgi waqıtta xojalıqta 55 bas iri qara násilli mal baǵılmaqta. Mal ushın zárúr azıqlıq eginler – jońıshqa, mákke, júweri, qant láblebi hám palız ónimleri 24,5 gektar maydanda jetistirilmekte.
Keyingi mánzil – “Begjaplı Beksultan” fermer xojalıǵında bolsa 2021-jılı Germaniyadan 63 bas “Golshtın” násilindegi iri qara mallar alıp kelingen bolıp, házirgi waqıtta 74 bas násilli iri qara mal bar. Bul xojalıq kúnine ortasha 18 litr sút islep shıǵarıp, hár ayda 10 tonnaǵa jaqın sút ónimlerin rayon hám Nókis qalası bazarlarına jetkerip bermekte.
Media-tur sheńberinde jurnalistler “Mamıy” awıl puqaralar jıyınında jasawshı Tórexan Moldaǵaliyevtıń shańaraǵına da bardı. Ol shańaraq aǵzaları menen birgelikte 10 bas túye, sonıń ishinde 6 bas sawın túyeni baǵıp atır. Túyelerden alınatuǵın sút joqarı sapalı bolıp, salamatlandırıwshı qásiyetleri menen xalıqtıń qızıǵıwshılıǵın tartpaqta. Bul jumıs tek ǵana shańaraqtıń tabıs deregi emes, al túyeshilikti rawajlandırıwda úlgili tájiriybe sıpatında xızmet etpekte.
Bul media-tur sharwashılıq hám túyeshilik tarawlarında erisilip atırǵan nátiyjelerin jámiyetshilikke jetkeriw, tájiriybe almasıw hám tarawdaǵı ashıqlıqtı támiyinlewge qaratılǵan áhmiyetli qádem boldı.
