Ámiwdárya rayonında baǵshılıq hám júzimgershilik rawajlanıp atır

Ámiwdárya rayonı Shaykól awıl puqaralar jıyını aymaǵında jaylasqan “Manǵıt Omad Savdo” JShJ 2019-jılı shólkemlestirilgen bolıp, búgingi kúnde jámi 12 gektar jer maydanına iye. Sonnan 8 gektarında júzim baǵları payda etilgen.

Xojalıqtıń 7 gektar maydanında júzimniń “Taypi” sortı egilgen bolıp, jetistirilip atırǵan ónim Qazaqstan hám Rossiya mámleketlerine eksport etilmekte. Sonday-aq, 1 gektar maydanǵa júzimniń “Avatar” sortı egilip, kelesi jıldan baslap ónim beriwi kútilmekte.

JShJ basshısı Azimjan Jumamuratovtıń atap ótiwinshe:
– Ótken jılı 100 tonna júzim eksport etken edik. Bıyıl da usı dástúrdi dawam ettiremiz, – deydi ol.

Búgingi kúnde Ámiwdárya rayonında baǵshılıq hám júzimgershilik baǵdarında 61 awıl xojalıǵı kárxanası xızmet kórsetpekte.
Olardıń ulıwma maydanı 1046 gektardı qurap, sonnan 641 gektarı zúráátli baǵlar, 405 gektarı bolsa jańadan payda etilgen baǵlar bolıp esaplanadı.
Usı jıldıń báhár máwsiminde fermer xojalıqları hám awıl xojalıǵı kárxanaları tárepinen rayonda 76 gektar maydanda intensiv baǵlar shólkemlestirildi.

Sońǵı jılları rayonda baǵshılıqqa qızıǵıwshılıq artıp, bul tarawda xızmet kórsetiwshilerdiń sanı barǵan sayın kóbeyip barmaqta.