Qaraqalpaqstanda Germaniya delegaciyası menen agrar tarawda birge islesiw máseleleri dodalandı
Sońǵı jılları Prezidentimiz Shavkat Mirziyoevtiń baslamaları menen Qaraqalpaqstanda awıl xojalıǵın reformalaw, zamanagóy texnologiyalardı engiziw hám xalıqaralıq birge islesiwdi rawajlandırıw baǵdarında sistemalı jumıslar ámelge asırılmaqta. Atap aytqanda, shet el mámleketleri menen agrar tarawda tájiriybe hám jańalıqlar almasıw úlken áhmiyetke iye bolmaqta.
Usı múnásibet penen, Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı, Qaraqalpaqstan Respublikası Awıl xojalıǵı ministri Shuhrat Teshaev Germaniya Federativ Respublikası Bundestaginiń Awıl xojalıǵı hám azıq-awqat máseleleri boyınsha komitetiniń baslıǵı Hermann Ferber basshılıǵındaǵı delegaciyanı qabıl etti.
Sapar sheńberinde bolıp ótken ushırasıwda komitet sekretariatınıń baslıǵı Vinfrid Xolc, Bundestag deputatları Kristof Frauenprays, Shteffen Yanix hám Ina Latendorf ta qatnastı.
Sáwbetlesiw dawamında Qaraqalpaqstanda agrar tarawdı rawajlandırıw boyınsha ámelge asırılıp atırǵan reformalar dodalandı. Sonıń ishinde, fermer xojalıqları hám sharwashılıq penen shuǵıllanıwshı isbilermenlerdi qollap-quwatlaw, tarawdı sanlastırıw, egislik maydanlarında tamshılatıp suwǵarıw hám lazerli tegislew sıyaqlı zamanagóy texnologiyalardı engiziw máselelerine ayırıqsha dıqqat qaratıldı.
Sonday-aq, miywe-kókonis ónimlerin tereń qayta islew, organikalıq ónimlerdi sertifikatlaw hám bul baǵdardaǵı qollap-quwatlaw mexanizmleri dodalandı. Qaraqalpaqstan Respublikasınıń klimat sharayatı, diyqanshılıqtaǵı jetiskenlikleri, Germaniyanıń agrar tarawındaǵı aldıńǵı tájiriybeleri hám agrar jańalıqlar boyınsha sheshimler talqılandı. Sonday-aq, eki tárepleme birge islesiwdi keńeytiw perspektivaları boyınsha pikir almasıldı.
Bul ushırasıw Qaraqalpaqstan hám Germaniya arasındaǵı awıl xojalıǵı tarawındaǵı birge islesiwdi jańa basqıshqa alıp shıǵıw jolındaǵı áhmiyetli qádem boldı. Ushırasıw juwmaǵında tárepler agrar tarawda birgelikli joybarlardı ámelge asırıw, qánigeler almasıwın jolǵa qoyıw hám tájiriybe almasıwdı dawam ettiriwge kelisip aldı.
