Qıytaq jerden paydalanıwda Beruniy tájiriybesi – Biybazar máhállesinde nátiyjelilik hám miynet súygishlik úlgisine aylanǵan tájiriybe

Gúz máwsimi awıllıq jerlerde eń mashaqatlı, eń bereketli máwsimlerden biri. Dál usı waqıtta qıytaq jerlerde jetistirilgen ovosh hám palız eginlerin jıynap-terip, qısqa saqlaw jumısları qızǵın dawam etedi. Beruniyliler bul tarawda ózine tán tájiriybege iye bolıp, jerden ónimli paydalanıw, máwsim dawamında 2-3 márte zúráát alıw arqalı turaqlı dáramat tabıw sırların puqta ózlestirgen.

Bul tarawda Biybazar awıl puqaralar jıyını xalqı úlgili xızmet kórsetpekte. Máhálledegi hár bir qıytaq jer iyesi óz jerinen aqılǵa muwapiqlı paydalanıw, zúráátlilikti arttırıw hám jetistirilgen ónimdi ishki bazarda satıw arqalı shańaraq dáramatın kóbeytiwge dıqqat awdarmaqta.

Atap aytqanda, Biybazar máhállesinde jasaytuǵın Qurol Bekmuratov óziniń 16 sotıxlıq qıytaq jerinen nátiyjeli paydalanbaqta. Ol 1 sotıx ıssıxanada qıyar hám túrli kók shópler egip, jıl dawamında qosımsha dáramat alıp atırǵan bolsa, qıytaq jerinde jetistirilgen ónimlerin jergilikli bazarlarǵa jetkerip beriwdi jolǵa qoyǵan.

Máhállede bunday belsendi insanlardıń sanı artıp baratırǵanı quwanıshlı jaǵday. Olar bir tárepten óz shańaraǵınıń abadanlıǵın támiyinlep atırǵan bolsa, ekinshi tárepten máhálleniń ekonomikalıq turmısına da sezilerli úles qospaqta.