Baǵ qatar ara maydanlarınan nátiyjeli paydalanıw máseleleri dodalandı

Nókis rayonı “Taqırkól” awıl puqaralar jıyınındaǵı “Diyana Mardona” fermer xojalıǵında baǵ qatar ara maydanlarına agrotexnikalıq islew beriw hám baǵ maydanlarınan nátiyjeli paydalanıw processlerin sistemalı shólkemlestiriw máselelerine baǵıshlanǵan gezektegi seminar ótkerildi.

Seminarda bul baǵdarda ámelge asırılıwı kerek bolǵan jumıslar, bar imkaniyatlar hám ónimdarlıqtı arttırıwǵa xızmet etetuǵın aldınǵı tájiriybeler haqqında tolıq maǵlıwmatlar berildi.

Qánigeler tárepinen baǵ qatar araları bos maydanlarınan ónimli paydalanıw arqalı masaqlı eginlerdi jetistiriw boyınsha metodikalıq kórsetpeler, agrotexnikalıq tárbiyalaw talapları, tóginlew normaları hám suw resurslarınan únemli paydalanıwdıń zamanagóy usılları haqqında túsinikler berildi.

Atap ótiliwinshe, bul qatnas ónimdarlıqtı arttırıw, egin túrlerin diversifikaciyalaw hám jer resurslarınan aqılǵa uǵras hám nátiyjeli paydalanıw imkaniyatların keńeytiwge xızmet etedi.

Sonday-aq, seminar dawamında baǵlarda ushırasıwı múmkin bolǵan kesellik hám zıyankeslerge qarsı gúresiw boyınsha ámeliy usınıslar berildi. Qánigeler olardıń rawajlanıw sharayatları, aldın alıw ilajların durıs shólkemlestiriw hám biologiyalıq hám ximiyalıq qorǵanıw qurallarınan paydalanıw tártibin túsindirip berdi.

Zıyankeslerge qarsı gúresiwde aldawshı belbewlerden paydalanıw nátiyjeli usıl ekeni, sonday-aq, fitosanitariyalıq qáwipsizlik talaplarına ámel etiw, profilaktikalıq qayta islew hám turaqlı monitoring alıp barıwdıń áhmiyeti ayrıqsha atap ótildi.