Taqıyatas rayonı Keneges APJ aymaǵında jumıs alıp barıp atırǵan Nayman Agro Teplica JShJ tárepinen bıyılǵı máwsimde 8,5 gektar maydanda pomidordıń “Musa” sortı egilip, házirgi waqıtta intensiv túrde tárbiyalanbaqta.

Isbilermenlerdiń atap ótiwinshe, ıssıxana kompleksinde zamanagóy agrotexnikalıq talaplar tiykarında tárbiyalaw jumısları alıp barılmaqta. Ósimliklerdiń ósiwi, zúráátliligi hám keselliklerge shıdamlılıǵı turaqlı monitoring etilip, tamshılatıp suwǵarıw sisteması arqalı kúnlik agrotexnikalıq rejim támiyinlenip kelinbekte.

Málim etiliwinshe, bul eginlerden alınatuǵın sapalı pomidorlar jańa jıl aldınan bazarǵa shıǵarılıwı rejelestirilgen. Bul bolsa ishki bazardı jergilikli, ekologiyalıq taza ónim menen támiyinlewge xızmet etedi.

Isbilermenlik subekti tárepinen ámelge asırılıp atırǵan bul baslama aymaqta ıssıxana xojalıǵın rawajlandırıw, xalıqtıń bántligin arttırıw hám awıl xojalıǵı ónimlerin jetkerip beriw kólemin kóbeytiwge áhmietli úles bolıp xızmet etpekte.