Shomanayda ǵálle jetistiriwde ónimdarlıqtı arttırıw boyınsha kórgizbeli seminar bolıp ótti
Shomanay rayonındaǵı “Komil Yusupov” fermer xojalıǵınıń atız maydanlarında ǵálle eginleri mısalında kórgizbeli ámeliy seminar bolıp ótti. Onda Dán hám salı ilimiy-óndirislik birlespesiniń direktorı Dúysenbay Utambetov qatnastı.
Seminarda ǵálle tárbiyasın durıs shólkemlestiriw, ónimdarlıqtı arttırıw, jerlerdi shor juwıwǵa tayarlaw, suwdı únemleytuǵın texnologiyalardı engiziw, suwǵarıw tarmaqların betonlastırıw arqalı suw resurslarınan nátiyjeli paydalanıw máseleleri dodalandı.
Ilajda fermer xojalıqlarınıń basshıları, klasterlerdiń wákilleri, awıl xojalıǵı xızmetkerleri hám taraw qánigeleri qatnasıp, dala sharayatında ámeliy usınıslar hám aldınǵı tájiriybeler menen tanıstı. Qánigeler agrotexnikalıq ilajlardı belgilengen múddetlerde hám sapalı ámelge asırıw boyınsha túsinikler berdi.
Seminar juwmaǵında ǵálle jetistiriw nátiyjeliligin arttırıw, suw resurslarınan aqılǵa uǵras paydalanıw hám keleshektegi tiykarǵı wazıypalar boyınsha anıq ilajlar belgilendi.
