Nókis rayonında ǵawasha tárbiyasına baǵıshlanǵan dala seminarı ótkerildi Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Komiljan Aytbaevtıń basshılıǵında Nókis rayonında ǵawasha tárbiyasında agrotexnikalıq ilajlardı óz waqtında hám sapalı ámelge asırıw máselelerine baǵıshlanǵan dala seminarı shólkemlestirildi. Seminarǵa “Ózagroinspekciya”nıń Qaraqalpaqstan Respublikası basqarmasınıń baslıǵı E.Qayıpbergenov, Nókis rayonı hákimi Z.Zaytov, awıl xojalıǵı tarawınıń qánigeleri, fermer xojalıqlarınıń basshıları hám juwapker shólkemlerdiń wákilleri qatnastı. Dala seminarı dawamında ǵawasha maydanlarında ámelge asırılıwı zárúr bolǵan agrotexnikalıq ilajlardı belgilengen múddetlerde hám sapalı orınlaw, suwǵarıw hám azıqlandırıw jumısların durıs shólkemlestiriw, zıyankesler hám keselliklerge qarsı nátiyjeli gúresiw, ósimliklerdi qorǵaw hám ónimdarlıqtı arttırıwǵa qaratılǵan ámeliy usınıslar berildi. Sonday-aq, qánigeler tárepinen ǵawashanı tárbiyalawda aldınǵı agrotexnologiyalardı qollanıw, mashqalalardı saplastırıw hám joqarı zúráát alıw ushın zárúr ilajlardı sistemalı ámelge asırıw boyınsha tiyisli usınıs hám tapsırmalar berildi.