Awıl xojalıǵı texnikalarınıń jumıs ónimdarlıǵın arttırıwdaǵı texnika túrleri
Diyqan ushın jıldıń tórt máwsimi de jumıs máwsimi bolıp, jıl boyı pidayı miynet etip, jetistirilgen zúráátti jıynap-terip alǵan diyqanlar, zúráátten bosaǵan jerlerdi shúdigarlaw hám shor juwıwǵa tayarlaw jumısları menen bir qatarda texnikalardı ońlawǵa da kirisedi.
Xalqımız “texnika diyqannıń qol-qanatı” dep biykarga aytpaǵan.Awıl xojalıǵı texnikaların qısta báhárgi egiw máwsimine puqta tayarlaw jańa máwsim jumıslarınıń óz waqtında hám nátiyjeli orınlanıwına tiykar jaratadı.
Máselen, shigit egiwge kirisiwden aldın seyalkanıń pútinligi, bólimi hám detalları jaqsı bekkemlengenligi tekseriledi, egiw procesine hám sapasına tikkeley tásir etiwshi bólimlerge ayrıqsha itibar qaratıladı.Shigit egiw seyalkasınıń texnikalıq jaǵdayı bolsa, máwsim aldınan hám jumıs dawamında onıń sazlıq dárejesine qarap bahalanadı, sonday-aq, máwsim dawamında artıqsha mashqalalardı keltirip shıǵarmaydı.
Awıl xojalıǵı texnikalarınıń jumıs nátiyjeligin arttırıwdaǵı texnika túrlerine: súriwshi traktorlar, kultivatorlar, shigit egiw seyalkaları, mineral tógin sepkishler, jer tegislew úskeneleri, shizeller, paxta teriw mashinaları, ǵálle orıw kombaynları, jańa zamanagóy awıl xojalıǵı traktorları, tisli baronalar hám taǵı basqada texnika túrleri kiredi.
Bul texnikalar insan qolı menen orınlanatuģın kóplegen awır jumıslardı avtomatlastırıwģa imkan beredi.Máselen, traktorlar, kombaynlar, egiw hám suwǵarıw mashinaları sıyaqlı texnikalar, úlken maydanlarda qısqa waqıt ishinde kóplegen jumıslardı orınlaydı.Bul bolsa, miynet ónimdarlıǵın sezilerli dárejede arttıradı.
Olar kóp funkciyaga iye bolıp, bir waqıttıń ózinde bir qansha jumıslardı orınlaydı.Mısalı, egislik jer maydanlardı súriw, egiw, tógin beriw hám shóplerdi tazalaw sıyaqlı islerdi ámelge asırıwı múmkin.Nátiyjede Jumıs kólemi 30-40% ke artıp, qol miyneti sezilerli dárejede azayadı.
Arnawlı egiw texnikaları (mısalı, egiw seyalka mashinaları) tuqımlardı birdey tereńlikte hám anıq orında egiw imkaniyatın jaratadı.Bul zúrááttiń bir tegis ósiwin hám optimal tóginleniwin támiyinleydi.Sonday-aq, resurslardı únemlep, zúráátlikti arttıradı.
