Texnikalıq bazanı bekkemlew hám nátiyjelilikti arttırıw mámleket awıl xojalıǵın rawajlandırıwdıń tiykarǵı baǵdarlarınan biri bolıp esaplanadı.Házirde jumıs saparı menen Qaraqalpaqstan Respublikasında bolıp turǵan Ózbekstan Respublikası Awıl xojalıǵı ministri Ibrohim Abdurahmonovtıń gezektegi mánzili de usı tarmaqqa qánigelestirilgen Ámiwdárya rayonındaǵı “Tolqin” juwapkershiligi sheklengen alternativ mashina traktor parkı boldı.

“Tolqin” MMTP aymaqtaǵı fermer xojalıqlarına texnikalıq xızmet kórsetedi.Fermer xojalıqlarına qaraslı paxta egiletuǵın maydanlardı óz waqtında shúdigarlaw, jerlerdi súriw, tegislew hám kelesi jıl ónimi ushın bekkem tiykar jaratıwda MMTPda jumıs processleri qızǵın dawam etpekte.

MMTP injener-texnik xızmetkerleri usı máwsimde de fermer xojalıqlarına texnikalıq xızmet kórsetiwdi bunnan bılay da jaqsılaw maqsetinde texnika quralların, egiske qatnasatuǵın agregatlardı sapalı ońlaw hám báhárgi máwsimge tayarlap qoyıw boyınsha fermer xojalıqları basshıları menen másláhátlesip jumıs alıp barmaqta.