Búgin Shımbay rayonındaǵı Qaraqalpaqstan diyqanshılıq ilim-izertlew institutında “Aral teńizi regionında hawa, jer hám suw resursların innovaciyalıq basqarıw arqalı jergilikli birge islesiwshilerdiń bilimin jetilistiriw” temasında oqıw seminarı bolıp ótti.
Onda Tashkent irrigaciya institutı docenti, texnika ilimleriniń kandidatı A.Karimov, Topıraqtanıw institutınıń laboratoriya baslıǵı, professor R.Kurbantaev hám de Berdaq atındaǵı Qaraqalpaq mámleketlik universitetiniń geografiya ilimleriniń kandidatı O.Sultashova, “Innovation-ideas” JShJ baslıǵı G.Djumaniyazova, Qaraqalpaqstan diyqanshılıq ilim-izertlew institutınıń alımları, fermer xojalıqları basshıları qatnastı.
Oqıw-seminar dawamında “Suwǵarılatuǵın jerlerdiń agrofizikalıq ózgeshelikleriniń jaǵdayı” “Shorlanǵan topıraqlardıń biologiyalıq aktivligi hám de topıraqlardıń ónimdarlıǵın arttırıwdaǵı áhmiyeti” temasındaǵı bayanatlar ilimpazlar tárepinen atap ótildi.
Seminar juwmaǵında topıraq qatlamı, ónimdarlıǵı, eroziyası, shorlanıwı hám topıraqtaǵı organikalıq uglerodtıń roli sonday-aq, suwdıń sapasın monitoring etiw sistemasın ornatıw arqalı suw resursların aqılǵa uǵras basqarıw boyınsha alımlar tárepinen bir qatar usınıslar berildi.
