Taqıyatasta paxta qatar araların suwǵarıw boyınsha seminar bolıp ótti

Taqıyatas rayonı “Keneges” awıl puqaralar jıyını aymaǵında jaylasqan “Fayz Jalil” fermer xojalıǵında paxta qatar araların suwǵarıw boyınsha seminar shólkemlestirildi.

Seminarǵa Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshayev, Taqıyatas rayonı hákimi K.Aytbayev, rayon prokurorı A.Qipshaqbaev, rayon hákiminiń orınbasarları hám bir qatar jergilikli fermerler qatnastı.

Seminar dawamında paxta jetistiriwde suwdan aqılǵa muwapıq paydalanıw, házirgi zaman suwǵarıw texnologiyaların engiziw, sonday-aq, ónimdarlıqtı arttırıw máseleleri talqılandı.

Qaraqalpaqstan Respublikası Ministrler Keńesi Baslıǵınıń orınbasarı Sh.Teshayev óziniń sóylegen sózinde paxtashılıq tarawın rawajlandırıw, fermerlerge járdem beriw hám olardıń xızmetin qollap-quwatlaw mámleketlik siyasattıń tiykarǵı baǵdarlarınan biri ekenligin atap ótti.