Ámiwdárya rayonında ǵálle orımına baǵıshlanǵan ámeliy seminar bolıp ótti

Ámiwdárya rayonınıń Baǵ máhállesinde jaylasqan jetekshi xojalıqlardan biri – “Rahimboyev Azizbek” fermer xojalıǵınıń biyday atızında ǵálle orımına baǵıshlanǵan ámeliy seminar shólkemlestirildi.

Onda Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı A.Jumanazarov, Sanaat, qurılıs, transport hám baylanıs máseleleri komitetiniń baslıǵı I.Sdikov, Ámiwdárya rayonınıń hákimi S.Xojametov, hákim orınbasarları, awıl xojalıǵı tarawınıń qánigeleri, aqsaqallar, fermerler, jámiyetshilik hám ǵalaba xabar qurallarınıń wákilleri qatnastı.

Seminar basında elimizde diyxanshılıq ázelden tek ǵana tirishilik deregi emes, al muqaddes miynet tarawlarınan biri sıpatında qádirlenip kiyatırǵanı ayrıqsha atap ótildi.

Ilaj qatnasıwshıları aldında “Yusup Iyshan baba” jáme meshitiniń imam-xatibi A.Matsapaev Quran oqıp, usı máwsimniń tınısh, bereketli hám apatsız ótiwi ushın duwa etti. Jıynalǵanlar mol zúráát, amanlıq hám bereketlilik tilep, duaǵa qol kóterdi.

Seminarda Ámiwdárya rayonı hákimi Sobir Xojametov shıǵıp sóylep, dán máwsimi hár bir fermer hám diyxan ushın juwapkershilikli sınaw dáwiri ekenin, sonıń menen birge, elimizdiń azıq-awqat qáwipsizligin támiyinlewde úlken áhmiyetke iye ekenin atap ótti.

Maǵlıwmat ornında aytıw orınlı, Ámiwdárya rayonında 2025-jıl zúrááti ushın 270 fermer xojalıǵı hám awıl xojalıǵı kárxanaları tárepinen jámi 4800 gektar maydanǵa dán egilgen. Bul maydanlardan 11 mıń 130 tonna biyday jetistiriw rejelestirilgen.