Xalıqaralıq eksport standartları boyınsha seminar-trening ótkerildi

Qaraqalpaqstan Respublikası Suw xojalıǵı ministrliginiń májilisler zalında, usı jıldıń 9-iyun kúni Qaraqalpaqstan Respublikası Awıl xojalıǵı ministrligi, Turkcert Belgelendirme Xizmetleri sertifikatlastırıw shólkemi hám “Smart-TRC International Consulting Services” konsalting shólkemi menen birgelikte “Ózbekstan Respublikasında ónimler eksportın qollap-quwatlaw hám xalıqaralıq bazarlardaǵı ornın bekkemlew, xalıqaralıq sertifikatlar alıw tártibi” temasında seminar-trening shólkemlestirildi.

Seminar-treningtiń tiykarǵı maqseti – jergilikli óndirishilerge xalıqaralıq standartlarǵa muwapıq sertifikatlastırıw processleri, eksport múmkinshilikleri hám sırtqı bazarlarda básekige shıdamlılıqtı arttırıw jolların túsindiriwden ibarat.

Seminarǵa 2025-jılı xalıqaralıq standart talapların engiziw tilegin bildirgen awıl xojalıǵı hám azıq-awqat sanaatı tarawındaǵı tásirshil kárxanalardıń wákilleri, sonday-aq, Qaraqalpaqstan Respublikası Awıl xojalıǵı ministrliginiń rayon bólimleriniń xızmetkerleri qatnastı.

Seminar dawamında qatnasıwshılarǵa xalıqaralıq sertifikatlar alıw tártibi, eksport processindegi talaplar hám másláhát beriw xızmetleriniń artıqmashılıqları haqqında tolıq maǵlıwmatlar berildi. Bunday seminarlar tek ǵana eksport potencialın arttırıwǵa emes, al jergilikli kárxanalardı global básekige tayarlawǵa xızmet etedi.