Nókis rayonında press-tur: “Biogumus” fermer xojalıǵınıń tabıslı tájiriybesi
Qaraqalpaqstan Respublikası Awıl xojalıǵı ministrligi Baspasóz xızmetiniń baslaması menen ǵalaba xabar quralları xızmetkerleri ushın press-tur shólkemlestirildi.
Ilajdıń maqseti – Nókis rayonındaǵı aldıńǵı fermer xojalıqlarınıń jumısı menen jaqınnan tanısıw. Press-tur qatnasıwshıları dáslep Nókis rayonındaǵı “Biogumus” fermer xojalıǵında boldı. Bul xojalıq 2018-jıldan berli “Quyashta keptirılgen ekologiyalıq taza organikalıq pomidor islep shıǵarıw hám eksporttı keńeytiw” joybarın tabıslı ámelge asırıp kelmekte.
Joybar sheńberinde 320 million som qarjı baǵdarlanǵan. 2022-jılı bolsa óndiristi keńeytiw maqsetinde 5,7 milliard somlıq investiciya tartılıp, 300 tonna sıyımlı zamanagóy muzlatqıshlı qoymaxana hám qadaqlaw úskeneleri ornatıldı.
“Biogumus” fermer xojalıǵı tárepinen qayta islengen pomidor ónimleri ECOCERT ORGANIC STANDART hám ISO 22000:2018 xalıqaralıq sapa sertifikatlarına iye. Búgingi kúnde xojalıq tárepinen keptirılgen organikalıq pomidor ónimleri Italiya hám Franciya sıyaqlı mámleketlerge eksport etilmekte.
Press-turda keyingi mánzil – rayondaǵı palız hám qawın-ǵarbız jetistiriwshi fermer xojalıqları.
