🌿 Jerdi qádirleygen el — bereket tabadı

Kegeyli rayonı “Abat” awıl puqaralar jıyını aymaǵındaǵı “Kegeyli Aq Altın Agro Klaster” JShJ egislik maydanlarında awıl xojalıǵı tarawı ushın áhmiyetli bolǵan gúzgi shúdigarlaw temasına baǵıshlanǵan kórgizbeli-ámeliy seminar shólkemlestirildi.

Ilajda Qaraqalpaqstan Respublikası Ministrler Keńesiniń Baslıǵı Farhod Ermanov, Joqarǵı Keńestiń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı Anvar Jumanazarov, Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Shuhrat Teshaev, sonday-aq, Nókis, Kegeyli, Bozataw, Qaraózek hám Taxtakópir rayonlarınıń hákimleri, taraw juwapkerleri, aldıńǵı fermerler hám ǵalaba xabar qurallarınıń wákilleri qatnastı.

Seminarǵa start berip atırıp, Qaraqalpaqstan Respublikası Ministrler Keńesiniń Baslıǵı Farhod Ermanov usı jılǵı paxta zúráátin jıynap-terip alıwda pidákerlik penen miynet etken diyxan hám fermerlerge shın júrekten minnetdarshılıq bildirdi. Ol óz sózinde: – Jer – biybaha baylıq. Onı óz waqtında hám sapalı shúdigarlap, durıs tárbiyalaǵan halda qatnas jasaw, kelesi jılı mol zúráát alıwdıń eń áhmiyetli girewi, – dep atap ótti.

Sonday-aq, Farhod Ermanov gúzgi shúdigarlaw jumısların nátiyjeli shólkemlestiriw, jerlerdi báhárgi eginlerge tayarlaw, suw hám texnikalıq resurslardan aqılǵa muwapıq paydalanıw hám topıraqtıń ónimdarlıǵın arttırıw boyınsha anıq wazıypalardı belgilep berdi.

Ilaj dawamında Ministrler Keńesi Baslıǵınıń awıl hám suw xojalıǵı boyınsha orınbasarı Shuhrat Teshaev hám bir qatar rayon hákimleri sóz sóylep, gúzgi shúdigarlaw jumısların belgilengen múddetlerde hám agrotexnikalıq talaplar tiykarında sapalı ámelge asırıw zárúrligin ayrıqsha atap ótti.

➡️ Bul seminar tek ǵana ámeliy tájiriybe almasıw emes, al diyxan hám fermerler ushın kelesi máwsimge puxta tayarlıq kóriw, jer ónimdarlıǵın arttırıwda úlken áhmiyetke iye.