📌 Paxta teriw mashinaları mexanizatorları ushın oqıw kursları baslandı
Ózbekstan Respublikası Awıl xojalıǵı ministrliginiń 2025-jıl 13-noyabrdegi tapsırmaları hám tiyisli ministrlikler hám mákemeler tárepinen qabıl etilgen qospa qarardıń orınlanıwın támiyinlew maqsetinde 17-21-noyabr kúnleri paxta teriw mashinaları mexanizatorları ushın 5 kúnlik qánigelik arttırıw oqıw kursları jolǵa qoyıldı.
Bul kurslarda Tórtkúl, Beruniy, Ellikqala hám Ámiwdárya rayonlarınıń mexanizatorları – Beruniy rayonı Agrotexnologiyalar texnikumında;
Qalǵan rayonlardıń mexanizatorları – Qaraqalpaqstan awıl xojalıǵı hám agrotexnologiyalar institutında oqıtılatuǵını belgilendi.
Oqıw procesi dawamında qánigelerdiń túsligi hám uzaq rayonlardan kelgen qatnasıwshılardı jataqxana menen támiyinlew juwapker basshılarǵa júklendi.
Búgin oqıw seminarı Qaraqalpaqstan Respublikası Ministrler Keńesiniń awıl hám suw xojalıǵı boyınsha orınbasarı Sh.Teshaev basshılıǵında ashıldı. Ilajda mexanizatorlardıń kásiplik sheberligin arttırıw, texnikadan nátiyjeli paydalanıw hám jańa máwsimge sapalı tayarlıq máseleleri talqılandı.
Sh.Teshaev óz sózinde 2025-jılǵı paxta jıyım-teriminde jankúyerlik kórsetken kombayn operatorlarına minnetdarshılıq bildirip, oqıw kurslarınıń mazmunlı hám nátiyjeli ótiwin támiyinlew boyınsha tiyisli tapsırmalardı berdi.
