Xojeli rayonında ǵálleni azotlı mineral tóginler menen azıqlandırıw, suspenziya usılında japıraqtan azıqlandırıw, ǵálle maydanlarına jergilikli tógin shıǵarıw hám sebiw boyınsha kórgizbeli seminar shólkemlestirildi.
Seminarǵa Qaraqalpaqstan Respublikası Awıl xojalıǵı ministriniń birinshi orınbasarı A.Koziyev, Ózbekstan Respublikası Ósimlikler karantini hám qorǵaw agentliginiń direktorı I.Ergashev, Awıl xojalıǵında bilim hám innovaciyalar milliy orayınıń Qaraqalpaqstan Respublikası agroxızmetler orayınıń qánigeleri, Qaraqalpaqstandaǵı Ilimiy-izertlew institutlarınıń direktorları hám ilimpazları, Xojeli rayonı awıl xojalıǵı bóliminiń xızmetkerleri, rayondaǵı klaster hám fermer xojalıqlarınıń basshıları qatnastı.
Onda ǵálleshilikte áhmiyetli agrotexnikalıq ilajlardan biri bolǵan mineral hám jergilikli tóginler menen azıqlandırıw hám de suspenziya usılında japıraqtan azıqlandırıw, ǵálle maydanlarına jergilikli tógin shıǵarıw hám sebiw boyınsha taraw wákilleriniń usınısları tiykarında keń túsinikler aytıp ótildi.
Sonday-aq, seminar dawamında Ózbekstan Respublikası Prezidentiniń 2024-jıl 30-dekabrdegi “Awıl xojalıǵı maydanlarındaǵı qosımsha imkaniyatlardan paydalanǵan halda ónim jetistiriwdi kóbeytiwge baylanıslı ilajlar haqqında”ǵı PQ-465-sanlı Qararınıń mazmun-mánisi menen birgelikte jaratılǵan jeńillikler hám belgilengen wazıypalar atap ótildi.
