Sharwa fermer xojalıǵında identifikaciya jumısları alıp barılmaqta
Ózbekstan Respublikası Prezidentiniń 2023-jıl 24-avgusttaǵı PQ-285-sanlı “Sharwashılıqta identifikaciyalaw sisteması hám násilshilik tarawın jetilistiriwge baylanıslı qosımsha ilajlar haqqında”ǵı qararınıń orınlanıwın nátiyjeli shólkemlestiriw maqsetinde Shomanay rayonı “Qarabaylı” mákan puqaralar jıyını aymaǵında jaylasqan “Sultan bereketli” sharwa fermer xojalıǵında sırǵalaw identifikaciya jumısları alıp barılmaqta.
Bul processtiń áhmiyetli bólegi sıpatında xojalıqta baǵılıp atırǵan qara mallardı identifikaciyalaw boyınsha seminar ótkerildi.
Seminarǵa xojalıq xızmetkerleri, jergilikli fermerler hám sharwashılıq tarawına baylanıslı qánigeler qatnastı.
Identifikaciyalaw sisteması sharwa mallarıń kelip shıǵıwın, náslin, densawlıǵın hám basqa da áhmiyetli maǵlıwmatlardı anıqlawǵa múmkinshilik beredi. Bul bolsa sharwashılıqtı basqarıw, násilshilik jumısların jaqsılaw, keselliklerdiń aldın alıw hám haywanlardı satıwdı qadaǵalawda áhmiyetli rol atqaradı.
Seminar qatnasıwshıları identifikaciyalaw procesin ámelde kóriw múmkinshiligine iye boldı. Tájiriybeli qánigeler tárepinen sharwa mallarına elektron chip ornatıw, identifikaciya nomerin dizimge alıw hám maǵlıwmatlar bazasına kirgiziw procesi kórsetildi. “Sultan bereketli” sharwa fermer xojalıǵında ótkerilgen bul seminar sharwashılıq tarawın zamanagóylestiriw hám rawajlandırıwǵa qaratılǵan áhmiyetli qádem boldı.
