«Miynet túbi ráhát» – deydi dana xalqımız!

Haqıyqatında da, jerden nátiyjeli paydalanıw, hadal miynet penen ırısqı tabıw, insan qálbinde maqtanısh hám baxıt sezimin oyatadı. Ásirese, búgingi kúnde qıytaq jerden aqılǵa uǵras paydalanıw tek ǵana shańaraq byudjetin bekkemlew emes, al jámiyetimizdiń azıq-awqat qáwipsizligin támiyinlewde de áhmiyetli faktorǵa aylanbaqta. Taxtakópir rayonı «Atakól» awıl puqaralar jıyını aymaǵında jasawshı Jarımbetovlar shańaraǵı mine usınday úlgili shańaraqlardan biri bolıp esaplanadı. Olar ózlerine tiyisli 60 sotix jer maydanınan aqılǵa uǵras paydalanıp, jıl dawamında túrli miywe-ovosh ónimlerin jetistirip kelmekte. Bul qıytaq jerde piyaz, baklajan, burish, pomidor, qıyar, kapusta, lobiya sıyaqlı ovoshlar, sonday-aq, alma, almurt, júzim, erik hám basqa da miyweler jetistirilmekte. Jarımbetovlar shańaraǵı tek ǵana óziniń shańaraqlıq mútájliklerin qanaatlandırıp qoymastan, al qońsılarına, tanıs-bilislerine hám hátteki jergilikli bazarlarǵa da ónim jetkerip beriw arqalı xalqımız dasturxanınıń molshılıǵına múnásip úles qospaqta.