Taqıyatasta miywe hám júzim baǵları ǴXQ dıqqatın tarttı

Qaraqalpaqstan Respublikası Awıl xojalıǵı ministrliginiń baspasóz xızmeti hám Agrosanaattı rawajlandırıw agentliginiń Qaraqalpaqstan Respublikası bólimi menen birgelikte miywe hám júzim jetistiriwshi fermerlerdiń jumısın keńnen tanıstırıw maqsetinde ǴXQ wákilleri ushın Taqıyatas rayonına press-tur shólkemlestirildi.

Press-tur dawamında jurnalistler Taqıyatas rayonındaǵı aldıńǵı fermer xojalıqlarınıń jumısı menen jaqınnan tanıstı. Atap aytqanda, Keneges awıl puqaralar jıyınındaǵı “Tóreev Sultamurat biy” fermer xojalıǵınıń 1 gektar júzimzar hám 7 gektar maydandaǵı alma, shabdal, almurt, erik baǵları kózden ótkizildi. Sonday-aq, Awezniyazov Qurbanbay fermer xojalıǵınıń 10 gektar maydandaǵı alma, erik, shabdalı baǵları hám “Jalayır” fermer xojalıǵı tárepinen shólkemlestirilgen 8,5 gektar maydandaǵı alma hám shabdalı baǵları da kórsetip ótildi.

Atap ótiw orınlı, Taqıyatas rayonında baǵshılıq hám júzimgershilik baǵdarında xızmet kórsetip atırǵan 55 awıl xojalıǵı kárxanası bar bolıp, olarda jámi 218 gektar miyweli baǵlar hám 10 gektardan artıq júzim baǵları jaratılǵan.

Press-tur qatnasıwshıları fermerler menen sáwbetlesip, olardıń mashqalaları hám jetiskenlikleri menen qızıqsındı. Miywe hám júzim jetistiriw tarawındaǵı jańalıqlar, texnologiyalar hám keleshekli jobalar talqılandı.

Bul is-ilaj Qaraqalpaqstanda awıl xojalıǵın rawajlandırıw, atap aytqanda, baǵshılıq hám júzimgershilik tarawın qollap-quwatlawǵa baǵdarlanǵan háreketlerdiń bir bólegi bolıp esaplanadı. ǴXQ wákilleri arqalı fermerlerdiń tájiriybesin keń jaydırıw, tarawdı jáne de rawajlandırıwǵa xızmet etedi.