XOJELIDE AWIL XOJALIǴI TARAWINDAǴI ÁHMIYETLI WAZIYPALAR DODALANDI

Xojeli rayonında Qaraqalpaqstan Respublikası Ministrler Keńesi baslıǵınıń awıl hám suw xojalıǵı máseleleri boyınsha orınbasarı, Awıl xojalıǵı ministri Sh.Teshaev basshılıǵında fermer xojalıqları hám basqa da awıl xojalıǵı kárxanaları basshılarınıń qatnasıwında májilis bolıp ótti.

Onda Ózbekstan Respublikası Prezidenti hám Ministrler Kabinetiniń awıl xojalıǵına baylanıslı qarar hám pármanları, normativlik-huqıqıy hújjetlerdiń mazmun-mánisi, sonday-aq, isbilermenlik subektlerine jaratılıp atırǵan imkaniyatlar hám jeńillikler haqqında tolıq maǵlıwmat berildi.

Májiliste awıl xojalıǵı tarawında ámelge asırılıwı zárúr bolǵan áhmiyetli wazıypalar dodalanıp, atap aytqanda: kelesi jılǵı biyday egisine tayarlıq, jerlerdi shor juwıw hám suwǵarıw jumısları, suw támiynatı qıyın bolǵan aymaqlarda suwdı ádil bólistiriw máseleleri kórip shıǵıldı. Sh.Teshaev juwapkerlerge jap aqırındaǵı fermer xojalıqlarınıń atızlarına suwdı birinshi gezekte jetkerip beriw ilajların kóriwdi tapsırdı.

Sonday-aq, jaqınlasıp kiyatırǵan paxta terimi máwsimine tayarlıq sheńberinde qabıllaw punktlerin tayar jaǵdayǵa keltiriw, bar texnikalardı sazlaw hám atız jumıslarınıń nátiyjeliligin arttırıw máseleleri de kórip shıǵıldı.

Ushırasıw dawamında fermer xojalıqlarınıń basshıları ózlerin qızıqtırǵan sorawlarǵa juwaplar aldı hám aldaǵı jumıslar boyınsha anıq wazıypalar belgilep alındı.