Taqıyatas rayonında kórgizbeli seminar ótkerildi

Taqıyatas rayonındaǵı “Naymankól” APJ aymaǵında jaylasqan fermer xojalıqları atız maydanlarında ǵawasha maydanlarında defoliaciya ilajların sistemalı ámelge asırıw boyınsha kórgizbeli seminar bolıp ótti.

Ilajda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev, Qaraqalpaqstan Respublikası Ósimlikler karantini hám qorǵaw agentliginiń baslıǵı R.Sherbaev, rayon hákimi K.Aytbaev, tiyisli taraw juwapkerleri hám diyxan-fermerler qatnastı.

Seminarda defoliaciya ilajlarınıń agrotexnikalıq áhmiyeti, onı sapalı hám óz waqtında orınlawdıń ónimdarlıqqa tásiri, sonday-aq, zamanagóy usıllar hám ximiyalıq qurallardan paydalanıw boyınsha tolıq túsinikler berildi.

Qánigeler tárepinen dala jaǵdayında ámeliy kórsetpeler berilip, fermer xojalıqlarına nátiyjeli defoliantlardıń túrleri, olardı qollanıw muǵdarları hám qáwipsizlik qaǵıydaları haqqında maǵlıwmatlar usınıldı.

Sonday-aq, seminarda zúráátti óz waqtında jıynap-terip alıw, paxta sapasın saqlaw hám kelesi jılǵı egin maydanların tayarlaw máselelerine de ayrıqsha dıqqat qaratıldı.

Ilaj juwmaǵında qatnasıwshılar ózlerin qızıqtırǵan sorawlarına juwap aldı hám aldıńǵı tájiriybeler almasıldı.