Awıl xojalıǵında ashıq-aydınlıq hám nátiyjelilikke qaray qadam
Ózbekstan Respublikası Awıl xojalıǵı ministri Ibrohim Abdurahmonov Qaraqalpaqstan Respublikasına jumıs saparı menen kelip, bir qatar klaster hám fermer xojalıqlarınıń jumısı, sonday-aq, paxta jıyın-terimi processleri menen jaqınnan tanıstı. Ministrge Qaraqalpaqstan Respublikası Ministrler Keńesiniń Baslıǵı Farhod Ermanov joldas boldı.
Sapar dawamında ministr jaslardıń potencialın qollap-quwatlaw, agrotexnikalıq ilajlardı sistemalı shólkemlestiriw hám paxta qabıllaw orınlarında ashıq-aydınlıqtı támiyinlew máselelerine ayrıqsha dıqqat qarattı. Xojeli rayonındaǵı Jaslar sociallıq-ekonomikalıq orayında jaratılǵan sharayatlar menen tanısıp, ol jaslardıń innovaciyalıq ideyaları hám ámeliy bilimlerin awıl xojalıǵın rawajlandırıwǵa baǵdarlaw áhmiyetli ekenligin atap ótti.
“Fayz agro klaster,” “Ekoteks klaster” hám basqa da paxta qabıllaw orınlarında ótkerilgen úyreniwlerde tárezxana hám laboratoriyalardıń jumısın jetilistiriw, elektron platformalarda maǵlıwmatlardı anıq sáwlelendiriw hám úsh smenalı jumıs tártibin jolǵa qoyıw boyınsha kórsetpeler berildi.
Taqıyatas, Ámiwdárya hám Beruniy rayonlarındaǵı atızlarda paxta sortları zamanagóy agrotexnologiyalar tiykarında tárbiyalanıp atırǵanı, ónimdarlıq aldınǵı jıllarǵa salıstırǵanda joqarı bolıwı kútilip atırǵanı atap ótildi. Terim processlerinde arnawlı mashinalardan paydalanıw, jabayı shóplerdiń joq ekenligi hám defoliaciya jumıslarınıń sapalı orınlanǵanı joqarı bahalandı.
Ministr jıyın-terim máwsiminde zúráátti zaya etpey jıynap alıw, qabıl etiwde isenim hám juwapkershilik principlerine qatań ámel etiw zárúrligin atap ótti. Sonıń menen birge, paxtashılıqta innovaciyalıq qatnaslardı keńeytiw, eginler arasına qosımsha zire egip, ónimdarlıqtı jáne de arttırıw boyınsha usınıslar berdi.
Beruniy klasterinde bolsa ashıq-aydınlıqtı támiyinlewge qaratılǵan jańa mexanizmler – “AgroTarozi,” “Agroplatforma” sıyaqlı sistemalar engizilgeni atap ótildi. Bunnan tısqarı, eń kóp paxta tapsırǵan fermerlerdi xoshametlew maqsetinde qımbatbaha sawǵalar beriletuǵını belgilendi.
Usı tárizde, Qaraqalpaqstanǵa ámelge asırılǵan sapar nátiyjeleri elimizdiń awıl xojalıǵı sistemasında alıp barılıp atırǵan reformalardıń izbe-iz dawam etip atırǵanın hám jańa basqıshqa kóterilip atırǵanın kórsetti.
