#Press_tur

Búgin Qaraqalpaqstan Respublikası Awıl xojalıǵı ministrligi Málimleme xızmetiniń baslaması menen Taqıyatas rayonında jaylasqan “Nukus Universal Baza” JShJ ıssıxanasınıń jumısı menen tanıstırıw maqsetinde ǵalaba xabar qurallarınıń qatnasıwında press-tur shólkemlestirildi.

Bul ıssıxana 2018-jılı Koreya Respublikasınan alıp kelingen zamanagóy texnologiyalar tiykarında úskenelengen bolıp, házir bir gektar maydanda YAponiyanıń “Betis F1” sortlı pomidorı jetistirilmekte. Kárxanada 3 jumısshı turaqlı jumıs penen támiyinlengen, máwsimlik jumıslar dáwirinde bolsa 20-25 jumısshınıń bántligi támiyinlenedi.

Press-tur dawamında jurnalistler “Nukus Universal Baza” JShJ hám Agrosanaattı rawajlandırıw agentliginiń Taqıyatas rayonlıq bólimi menen birgelikte ıssıxana iyeleri ushın pomidor hám basqa da ıssıxanada jetistiriletuǵın palız eginleriniń sortlarına baǵıshlanǵan seminar shólkemlestirilgenine gúwa boldı.

Maǵlıwmat ornında, Taqıyatas rayonında jámi 26 gektar maydanda ıssıxanalar bolıp, rayon bólimi qaramaǵında 7 ıssıxana dizimge alınǵan. Házirgi kúnde olardan 6 sı óz jumısın dawam ettirmekte. Bul ıssıxanalar qıs máwsiminde rayondaǵı xalıqtı arzan hám sapalı pomidor, qıyar hám basqa da túrdegi awıl xojalıǵı ónimleri menen turaqlı támiyinlep kelmekte.

Bul ilaj ıssıxana xojalıqlarında aldıńǵı tájiriybelerdi úgit-násiyatlaw, ónim jetistiriw nátiyjeliligin arttırıw hám fermerler arasında óz-ara birge islesiwdi kúsheytiwge xızmet etpekte.