Zamanagóy paxta teriw texnikaları boyınsha seminar ótkerildi
2026-jıl 19-yanvar kúni Qaraqalpaqstan awıl xojalıǵı hám agrotexnologiyalar institutı májilisler zalında zamanagóy paxta teriw texnikalarına baǵıshlanǵan seminar bolıp ótti.
Bul seminar Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı Anvar Jumanazarovtıń basshılıǵında shólkemlestirildi. Ilaj Ferǵana wálayatında Qıtay Xalıq Respublikası menen birgelikte zamanagóy paxta teriw mashinaların islep shıǵarıp atırǵan “Fergana Swan Cotton Industrial Machinery Stock Co” JShJ kárxanası tárepinen islep shıǵarılıp atırǵan “SWAN 4MZ-4” markalı paxta teriw mashinaları menen jaqınnan tanıstırıw maqsetinde ótkerildi.
Seminar dawamında usı texnikanıń texnikalıq imkaniyatları, nátiyjeliligi, paxta teriw procesinde miynet ónimdarlıǵın arttırıwdaǵı áhmieti hám ámeliy qollanıw tájiriybeleri haqqında tolıq maǵlıwmatlar berildi. Sonday-aq, qatnasıwshılar tárepinen qızıqtırǵan sorawlarǵa qánigeler tárepinen tolıq juwaplar berildi.
Ilajda Qaraqalpaqstan Respublikası Awıl xojalıǵı ministriniń birinshi orınbasarı A.Xalimbetov, Agrosanaat kompleksi ústinen qadaǵalaw inspekciyasınıń Qaraqalpaqstan Respublikası basqarması, “Ózagrolizing” AJ Qaraqalpaqstan Respublikası filialı, Qaraqalpaqstan awıl xojalıǵı hám agrotexnologiyalar institutı hám “Fergana Swan Cotton Industrial Machinery Stock Co” JShJ kárxanasınıń wákilleri, sonday-aq, rayon hákimlikleriniń awıl hám suw xojalıǵı máseleleri boyınsha orınbasarları, agroinspekciya qánigeleri, klasterler, fermer xojalıqları hám awıl xojalıǵı kárxanalarınıń basshıları qatnastı.
Seminar juwmaǵında zamanagóy texnikalardı awıl xojalıǵına keńnen engiziw, fermer hám klasterler menen birge islesiwdi jáne de kúsheytiw boyınsha pikir-usınıslar bildirildi.
