Ámiwdárya rayonı hákimliginiń májilisler zalında zamanagóy paxta teriw texnikaların awıl xojalıǵına engiziw máselelerine baǵıshlanǵan seminar shólkemlestirildi.
Bul ilaj Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı Anvar Jumanazarovtıń basshılıǵında ótkerildi. Seminar Ferǵana wálayatında Qıtay Xalıq Respublikası menen birgelikte zamanagóy paxta teriw mashinaların islep shıǵarıp atırǵan “Fergana Swan Cotton Industrial Machinery Stock Co” juwapkershiligi sheklengen jámieti tárepinen islep shıǵarılıp atırǵan “SWAN 4MZ-4” markalı paxta teriw mashinalarınıń texnikalıq imkaniyatları menen jaqınnan tanıstırıw maqsetinde shólkemlestirildi.
Ilaj dawamında usı texnikanıń tiykarǵı texnikalıq kórsetkishleri, nátiyjeliligi, paxta teriw procesinde miynet ónimdarlıǵın arttırıwdaǵı ornı hám ámeliy qollanıw tájiriybeleri boyınsha tolıq maǵlıwmatlar berildi. Sonday-aq, qatnasıwshılar tárepinen bildirilgen sorawlarǵa qánigeler tárepinen hár tárepleme hám tiykarlanǵan juwaplar berildi.
Seminarǵa Qaraqalpaqstan Respublikası Awıl xojalıǵı ministriniń birinshi orınbasarı A.Xalimbetov, Agrosanaat kompleksi ústinen qadaǵalaw inspekciyasınıń Qaraqalpaqstan Respublikası basqarması, “Ózagrolizing” AJ Qaraqalpaqstan Respublikası filialı, Qaraqalpaqstan awıl xojalıǵı hám agrotexnologiyalar institutı hám “Fergana Swan Cotton Industrial Machinery Stock Co” JShJ wákilleri qatnastı. Sonday-aq, ilajda rayon hákimlikleriniń awıl hám suw xojalıǵı máseleleri boyınsha orınbasarları, agroinspekciya qánigeleri, klasterler, fermer xojalıqları hám awıl xojalıǵı kárxanalarınıń basshıları da qatnastı.
Seminar juwmaǵında zamanagóy paxta teriw texnikaların awıl xojalıǵında keńnen engiziw, fermer xojalıqları hám klasterler menen birge islesiwdi bunnan bılay da rawajlandırıw boyınsha tiyisli usınıslar bildirildi.
