“Issıxanalarda ónim jetistiriw perspektivaları” atamasında press-tur ótkerildi

Qaraqalpaqstan Respublikası Awıl xojalıǵı ministrligi, Agrosanaattı rawajlandırıw agentliginiń Qaraqalpaqstan Respublikası bólimi hám Qaraqalpaqstan Respublikası Ósimlikler karantini hám qorǵaw agentliginiń baslaması menen jurnalistler, blogerler hám ǵalaba xabar quralları wákilleriniń qatnasıwında “Issıxanalarda ónim jetistiriw perspektivaları” atamasında press-tur shólkemlestirildi.

Press-tur sheńberinde qatnasıwshılar dáslep Beruniy rayonında jaylasqan “KASHFIYOTCHI YOSHLAR” jeke kárxanasınıń ıssıxanasına bardı.

2017-jılı Qubla Koreya texnologiyası tiykarında qurılǵan bul 2 gektarlıq ıssıxanada pomidor hám qıyar jetistiriw jolǵa qoyılǵan. Qatnasıwshılar ıssıxanadaǵı islep shıǵarıw procesleri, ónimniń sapası, jetistiriw usılları hám qollanılıp atırǵan zamanagóy texnologiyalar menen jaqınnan tanıstı.

Sonday-aq, “Ósimlikler karantini haqqında”ǵı Nızam talaplarına muwapıq, ıssıxanalarda jetistirilip atırǵan pomidor hám citrus eginleriniń fitosanitariyalıq qáwipsizligin támiyinlew, zıyanlı organizmlerdiń tarqalıwınıń aldın alıw hám olarǵa qarsı gúresiw jumısların nátiyjeli shólkemlestiriw maqsetinde Agentlik sistemasında 2026-jıl 15-yanvardan 16-fevralǵa shekem “Áhmiyetli 30 kúnlik” járiyalanǵanı hám bul is-ilajlar áyne usı sheńberde ámelge asırılıp atırǵanı atap ótildi.

Qánigeler tárepinen ıssıxana sharayatında fitosanitarlıq qadaǵalawdı támiyinlew, zıyankes hám keselliklerdiń aldın alıw, ónimniń qáwipsizligin támiyinlew hám eksport talaplarına ámel etiw baǵdarında ámelge asırılıp atırǵan jumıslar boyınsha túsinikler berildi.

Sonday-aq, Ósimlikler karantini hám qorǵaw agentliginiń kóshpeli laboratoriyası qánigeleri tárepinen ónimlerden úlgiler alınıp, laboratoriyalıq tekseriw jumısları ótkerildi.