Press-turdıń keyingi mánzili Ellikqala rayonında xızmet kórsetip atırǵan «UMIDBEK ODILBEK» JShJ ıssıxana kompleksi boldı.

2020-jılı shólkemlestirilgen, 3 gektar maydandı iyeleytuǵın bul ıssıxanada Qıtay texnologiyası tiykarında limon ósirip atırǵanı qatnasıwshılarda úlken qızıǵıwshılıq oyattı. Kompleks basshısı R.Kuliev tárepinen ıssıxanadaǵı agrotexnikalıq ilajlar, ónimdarlıq hám jumıs procesleri haqqında tolıq maǵlıwmatlar berildi.

Sonday-aq, qatnasıwshılar «UMIDBEK ODILBEK» JShJniń qoymaxanasın da kózden keshirdi. Ol jerde saqlanıp atırǵan palız eginleriniń fitosanitariyalıq jaǵdayı, ónimlerdi saqlaw sharayatları menen jaqınnan tanıstı.

Mámleketlik fitosanitariyalıq inspektorlar tárepinen qoymaxana zıyankesleri, olardıń aldın alıw hám úzliksiz qadaǵalaw ilajları boyınsha túsinikler berildi.

Ilaj dawamında kóshpeli laboratoriya qánigeleri tárepinen ónimlerden úlgiler alınıp, laboratoriya tekseriwleri ámelge asırıldı hám tiyisli juwmaqlar berildi.