Taqıyatas rayonında awıl xojalıǵı baǵdarında áhmiyetli seminar bolıp ótpekte

Házirgi waqıtta Taqıyatas rayonı hákimliginiń májilisler zalında Qaraqalpaqstan Respublikası Ministrler Keńesi Baslıǵınıń awıl hám suw xojalıǵı boyınsha orınbasarı, Awıl xojalıǵı ministri Kamiljan Aytbaevtıń basshılıǵında áhmiyetli ámeliy seminar bolıp ótpekte.

Bul seminar usı jıldıń báhárgi agrotexnikalıq ilajların sapalı shólkemlestiriw, atap aytqanda, ǵálle maydanların mineral tóginler hám biostimulyatorlar menen azıqlandırıw, “Shinjon” texnologiyası tiykarında shigit egiletuǵın maydanlarǵa zárúr bolǵan plyonka hám shlanglar menen támiyinlew, sonday-aq, kartoshka eginleri ushın tuqımlıq ónimlerdi jetkerip beriw máselelerine baǵıshlanǵan.

Seminarǵa Taqıyatas rayonı hákimi Islam Sidikov, hákim orınbasarları, awıl xojalıǵı tarawınıń qánigeleri, fermer xojalıqlarınıń basshıları hám klaster shólkemleriniń wákilleri qatnaspaqta.

Ilaj dawamında taraw juwapkerleri tárepinen jetkerip beriw sistemasın jetilistiriw, agrotexnikalıq processlerdi óz waqtında hám nátiyjeli ámelge asırıw, sonday-aq, zúráátlilikti arttırıwǵa qaratılǵan anıq wazıypalar belgilep berilmekte.

Seminardı Qaraqalpaqstan Respublikası Ministrler Keńesi Baslıǵınıń awıl hám suw xojalıǵı boyınsha orınbasarı alıp barmaqta hám qatnasıwshılarǵa áhmiyetli baǵdarlar boyınsha zárúr usınıslar hám tapsırmalar berilmekte.

Bul seminar aymaqta awıl xojalıǵı nátiyjeliligin arttırıw, zamanagóy agrotexnologiyalardı keńnen engiziw hám azıq-awqat qáwipsizligin támiyinlewde úlken áhmiyetke iye.