🌾 Taxtakópir rayonında agrar tarawda áhmiyetli seminar ótkerildi
Taxtakópir rayonı hákimliginiń májilisler zalında agrar tarawdı rawajlandırıwǵa baǵdarlanǵan náwbettegi seminar bolıp ótti. Ilaj Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı, Awıl xojalıǵı ministri Kamiljan Aytbaevtıń basshılıǵında shólkemlestirildi.
Seminar dawamında báhárgi agrotexnikalıq ilajlardı nátiyjeli shólkemlestiriw, egis maydanların sapalı shigit hám mineral tóginler menen óz waqtında támiyinlew, zamanagóy agrotexnologiyalardı keńnen engiziw hám jetkerip beriw sistemasın jetilistiriw máseleleri hár tárepleme dodalandı.
Ilajǵa fermer xojalıqlarınıń basshıları, Awıl xojalıǵı ministrligi xızmetkerleri, aymaqlıq awıl hám suw xojalıǵı bólimi qánigeleri, sonday-aq, tuxım, mineral tógin hám awıl xojalıǵı texnikaların jetkerip beriwshi kárxanalar wákilleri belsene qatnastı.
Seminarda eń áhmiyetli baǵdarlardan biri — xalıqtıń azıq-awqat qáwipsizligin támiyinlew máselesi ayrıqsha atap ótildi.
Seminar sońında ministr tárepinen fermerlerdiń múrájatları tıńlanıp, olardı sheshiw boyınsha juwapker shólkemler hám tiyisli basshılarǵa anıq tapsırmalar berildi.
