Ellikqala rayonında fermerler hám agroklasterler menen kóshpeli qabıllaw bolıp ótti

Qaraqalpaqstan Respublikası Ministrler Keńesi Baslıǵınıń awıl hám suw xojalıǵı boyınsha orınbasarı, Awıl xojalıǵı ministri Kamiljan Aytbaev tárepinen Ellikqala rayonı hákimliginiń májilisler zalında fermer xojalıqları hám agroklasterlerdiń wákilleri menen kóshpeli qabıllaw bolıp ótti.

Bul qabıllawdan gózlengen tiykarǵı maqset – aymaqtaǵı fermer hám diyxan xojalıqlarınıń múrájatları, mashqalaları hám usınısların tikkeley tıńlaw hám olardıń sheshimine ámeliy járdem beriwden ibarat boldı.

Kóshpeli qabıllawda Ellikqala rayonı hákiminiń awıl hám suw xojalıǵı máseleleri boyınsha orınbasarı A.Kóziev, ministrlik qánigeleri, sonday-aq, tuqım, mineral tógin hám awıl xojalıǵı texnikaların jetkerip beriwshi kárxanalardıń wákilleri qatnastı.

Process dawamında fermer hám diyxan xojalıqlarınıń wákilleri óz múrájatların ashıq hám erkin túrde bildirdi. Ministr tárepinen barlıq múrájatlar dıqqat penen tıńlanıp, olardıń kópshiligi ornında unamlı sheshildi. Qosımsha waqıt hám úyreniw talap etiletuǵın máseleler boyınsha bolsa tiyisli juwapkerlerge anıq tapsırmalar berildi.

Sonday-aq, ilaj dawamında fermerlerge awıl xojalıǵı texnikaların satıp alıw ushın ajıratılıp atırǵan jeńilletilgen kreditler hám bar imkaniyatlar haqqında tolıq maǵlıwmatlar berildi.

Bul kóshpeli qabıllaw aymaqta awıl xojalıǵı tarawın bunnan bılay da rawajlandırıw, fermerlerdiń mashqalaların sistemalı sheshiw hám olar menen ashıq pikirlesiwdi jolǵa qoyıwda úlken áhmiyetke iye boldı.