Qaraqalpaqstan Awıl xojalıǵı hám Agrotexnologiyalar institutında oqıw seminarı baslandı Qaraqalpaqstan Awıl xojalıǵı hám Agrotexnologiyalar institutında Qaraqalpaqstan Respublikası Awıl xojalıǵı ministrligi baslaması menen paxta teriw mashinaları mexanizatorların tayarlaw hám olardıń qánigeligin asırıwǵa baǵıshlanǵan 5 kúnlik oqıw seminarı baslandı. Seminardıń tiykarǵı maqseti – paxta jiyin-terim máwsimi aldınan mexanizatorlardıń teoriyalıq bilimlerin bekkemlew, ámeliy kónlikpelerin jetilistiriw hám paxta teriw mashinaların durıs hám nátiyjeli basqarıw boyınsha zamanagóy usıllardı úyretiwden ibarat. Seminar dawamında qatnasıwshılar paxta teriw texnikaların iske tayarlaw, texnikalıq qáwipsizlik qaǵıydaları, kúndelik texnikalıq xızmet kórsetiw, mashinalardan únemli paydalanıw hám mumkin bolǵan texnikalıq kemshiliklerdiń aldın alıw máseleleri boyınsha teoriyalıq hám ámeliy sabaqlarǵa qatnasadı. Atap ótilgenindey, paxta jiyin-terim máwsimine sapalı tayarlıq kóriw, texnikalardıń tolıq tayarlıǵın támiyinlew hám mexanizatorlardıń qánigeligin arttırıw jiyin-terim jumıslarınıń nátiyjeli hám joqarı sapada alıp barılıwında áhmiyetli orın tutadı.