Qaraqalpaqstanda paxtanı qabıl etiw hám saqlaw boyınsha qánigelerdiń tájiriybesi arttırılmaqta
Qaraqalpaqstan Awıl xojalıǵı hám agrotexnologiyalar institutında Ózbekstan Respublikası Prezidentiniń 2025-jıl 9-dekabrdegi PQ-370-sanlı qararı hám de Ózbekstan Respublikası Awıl xojalıǵı ministri I.Abduraxmanovtıń 2026-jıl 31-iyuldegi 01/24-1-10-05/192-sanlı tapsırmasınıń orınlanıwın támiyinlew maqsetinde paxtanı qabıl etiw, saqlaw hám dáslepki qayta islew processlerine juwapker qánigeler ushın tájiriybe arttırıw oqıw-seminarı shólkemlestirildi.
Bul oqıw shınıǵıwlarına Qaraqalpaqstandaǵı paxtanı qayta islew zavodları quramındaǵı 10 paxta tazalaw kárxanası hám 41 paxta qabıl etiw orınlarınıń 1-, 2- hám 3-zona tovarshıları, laboratoriya baslıqları, paxtanı qabıl etiw hám saqlaw ushın juwapker qánigeler hám de basqa da tiyisli xızmetkerler qatnastı. 
Oqıw-seminarlardı Respublikalıq jumısshı topar quramındaǵı Talshıqlı eginler ilimiy-izertlew institutınıń ilimpazları alıp bardı. Shınıǵıwlar dawamında paxta shiyki zatın qabıl etiw, sapa kórsetkishlerin anıqlaw, laboratoriyalıq analizler, saqlaw talaplarına ámel etiw hám de ámeldegi normativlik-huqıqıy hújjetler boyınsha teoriyalıq hám ámeliy bilimler berildi.
Seminar sońında tıńlawshılardıń bilim dárejesi test sınaqları hám soraw-juwaplar arqalı bahalandı. Test tapsırmaların tabıslı orınlaǵan qatnasıwshılarǵa reyting balları qoyılıp, tájiriybe arttırǵanlıǵın tastıyıqlawshı QR-kodlı sertifikat hám identifikaciyalıq beyjikler tapsırıldı.
Bul oqıw-seminarlar paxta ónimin qabıl etiw processleriniń ashıq-aydınlıǵın, ónim sapasın isenimli bahalaw hám de tarawda iskerlik júritip atırǵan qánigelerdiń kásiplik potencialın jáne de arttırıwǵa xızmet etedi.
