Baǵshılıq boyınsha kórgizbeli seminar bolıp ótti.
Báhár máwsiminiń kirip keliwi barlıq janzatlar hám ósimlikler dúnyasın janlandıradı. Bul waqıtta baǵshılıqta ámelge asırılatuǵın bir qansha áhmietli ilajlar bar. Beruniy rayonı Shabbaz awıl puqaralar jıyınındaǵı “Sabirov Sadulla baǵı” baǵshılıq fermer xojalıǵında kórgizbeli seminar bolıp ótti. Seminarǵa baǵshılıq, júzimgershilik baǵdarındaǵı fermer xojalıqlarınıń basshıları, agronomlar, awıl xojalıǵı tarawınıń juwapkerleri qatnastı.
“Ifoda” kompaniyası menedjerleri tárepinen baǵshılıqta zıyankeslerge hám túrli keselliklerge qarsı gúresiwshi preparatlar boyınsha usınıslar berildi. Seminar dawamında kóp jıllıq tájiriybege ie baǵmanlar tárepinen, baǵ tárbiyası boyınsha ámeliy másláhátlerge de toqtap ótildi.
Maǵlıwmat ushın: Beruniy rayonında 577 gektar miyweli baǵ maydanları bolıp, sonnan 443 gektar ónimge kirgen baǵ esaplanadı. 92 ga júzimzar maydanlarınıń 72 ga ónim berip kiyatırgan júzimzarlar bolip tabıladı. 2026-jılı baǵ qatar aralarına 411 gektar ovosh-palız eginleri jaylastırılatuǵın bolsa, sonnan 40 gektar maydanǵa erte piser kartoshka egiliwi rejelestirilgen.
