Ellikqala rayonında baǵshılıqtı rawajlandırıw, ónimdarlıqtı arttırıw hám zamanagóy agrotexnikalıq usıllardı keńnen engiziw maqsetinde ámeliy seminar shólkemlestirildi.

Ilaj Agrosanaattı rawajlandırıw agentligi joybar ofisiniń juwapkerleri basshılıǵında Tozabaǵ awılı aymaǵında jaylasqan «El agro tomorqa klaster» JShJne qaraslı 15 gektarlıq intensiv alma baǵında ótkerildi. Seminar dawamında alma tereklerine durıs forma beriw, máwsimlik kesiw jumısların ámelge asırıw, zıyanlı organizmler hám keselliklerge qarsı gúresiw, sonday-aq tóginlew hám ónimli suwǵarıw usılları boyınsha tolıq túsinikler berildi.

Ámeliy process dawamında qánigeler tárepinen terek shaqaların durıs kesiw texnikası kórsetip berildi. Sonday-aq, jas nállerdi kútiw, ónim sapasın jaqsılaw hám kelesi jılı joqarı ónimdarlıqqa erisiw boyınsha usınıslar berildi.

Seminarǵa rayonlıq awıl xojalıǵı bóliminiń qánigeleri, ósimlikler karantini hám qorǵaw tarawınıń wákilleri, sonday-aq rayondaǵı baǵshılıqqa qánigelesken fermer xojalıqlarınıń basshıları belsene qatnastı.