Nókis rayonında defoliaciya ilajların sapalı shólkemlestiriw máselelerine baǵıshlanǵan seminar ótkerildi

Nókis rayonı “Arbashı” APJ aymaǵında jaylasqan “Nukus Agro” JShJ atızlarında ǵawasha eginlerinde defoliaciya processlerin nátiyjeli shólkemlestiriw máselelerine baǵıshlanǵan ámeliy-kórgizbeli seminar ótkerildi.

Bul ilajda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh. Teshaev, Qaraqalpaqstan Respublikası Ósimlikler karantini hám qorǵaw agentligi baslıǵı R. Sherbaev, tiyisli shólkemlerdiń basshıları hámde diyqan hám fermer xojalıqlarınıń wákilleri qatnastı.

Seminar dawamında defoliaciya ilajlarınıń ónimdarlıqqa tásiri, olardı óz waqtında hám sapalı ámelge asırıwdıń áhmiyetliligi boyınsha hár tárepleme maǵlıwmat berildi. Qánigeler tárepinen zamanagóy agrotexnologiyalar, nátiyjeli ximiyalıq qurallardan paydalanıw hám olardı qollanıw tártipleri boyınsha túsinikler berildi.

Sonday-aq, dala sharayatında ámeliy shınıǵıwlar shólkemlestirilip, fermerlerge defoliantlardıń hár qıylı túrleri, qollanıw normaları hám qáwipsizlik talaplarına baylanıslı kórsetpeler berildi.

Ilaj sheńberinde jıyın-terimdi óz waqtında shólkemlestiriw, paxtanıń sapasın támiyinlew hámde kelesi jıl egin maydanların tayarlaw máseleleri de talqılandı.

Seminar juwmaǵında qatnasıwshılar ózlerin qızıqtırǵan sorawlarına juwap aldı hám tájiriybe almastı.