Ámiwdárya rayonınıń “Tolqın” hám “Aq altın” APJ aymaqlarında 2026-jılǵı shigit egiw máwsimine tayarlıq kóriw sheńberinde bir qatar ámeliy seminarlar shólkemlestirildi
Bul seminarlar Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı Anvar Jumanazarov, Qaraqalpaqstan Respublikası Awıl xojalıǵı ministriniń birinshi orınbasarı Anvar Xalimbetov basshılıǵında ótkerildi. Ilajda awıl hám suw xojalıǵı tarawlarına juwapker shólkemlerdiń basshıları, rayon hákimleriniń awıl hám suw xojalıǵı máseleleri boyınsha orınbasarları hám fermer xojalıqlarınıń basshıları qatnastı.
Seminarlardıń tiykarǵı maqseti awıl xojalıǵı jumısların ilimiy tiykarda, belgilengen agrotexnikalıq múddetlerde hám joqarı sapada shólkemlestiriw, sonday-aq, 2026-jıl ónimi ushın bekkem tiykar jaratıwdan ibarat boldı.
Ilajlar dawamında awıl xojalıǵı texnikaların ońlaw ustaxanalarında alıp barılıp atırǵan jumıslar, texnika hám agregatlardı máwsimge tayarlaw processleri ornında kózden ótkerildi. Sonıń menen birge, egislik jerlerdi súriw, lazerli tegislew, shor juwıwǵa jer tayarlaw, shel alıw hám shor juwıw jumıslarınıń barısı boyınsha ámeliy túsinikler berildi.
Sonday-aq, tuqımlıq shigitlerdi tazalaw, saylap alıw hám dárilew, biolaboratoriyalardı máwsimge tayarlaw máseleleri seminarlardıń áhmiyetli baǵdarlarınan biri boldı. Bul processler salamat náller jetistiriw hám joqarı ónimdarlıqqa erisiwde úlken áhmiyetke iye ekeni ayrıqsha atap ótildi.
Seminarlar procesinde shıǵıp sóylegen Komitet baslıǵı Anvar Jumanazarov jer hám suw resurslarınan aqılǵa uǵras paydalanıw, agrotexnikalıq ilajlardı tolıq hám sapalı ámelge asırıw búgingi kúnniń eń áhmiyetli wazıypalarınan biri ekenin atap ótti. Sonday-aq, shorlanǵan jerlerdiń meliorativlik jaǵdayın jaqsılaw hám suwdı únemleytuǵın texnologiyalardı keńnen engiziw arqalı turaqlı ónimdarlıqqa erisiw múmkin ekenligi atap ótildi.
Óz gezeginde, Suw xojalıǵı ministri Baxtiyor Yusupov ishki suwǵarıw tarmaqların betonlastırıw, qándeklerdi belgilengen normalarda qazıw, suwdıń jumsalıwın anıq esapqa alıw máselelerine ayrıqsha itibar qarattı. Onıń atap ótiwinshe, suwdan únemli hám nátiyjeli paydalanıw awıl xojalıǵınıń turaqlılıǵın támiyinlewdiń áhmiyetli faktorlarınan biri.
Ilajlar sheńberinde 2026-jıl ónimi ushın egilgen ǵálle maydanlarına tógin shıǵarıw, jerge jer qosıw, meliorativlik jaǵdaydı jaqsılaw hám ishki suwǵarıw sistemaların jetilistiriw boyınsha ámelge asırılıp atırǵan jumıslar dodalandı. Fermerler menen ashıqtan-ashıq sóylesiwler ótkerilip, olardıń usınıs hám mashqalaları tıńlandı hám juwapkerler tárepinen tiyisli usınıslar berildi.
Bul ámeliy seminarlar Ámiwdárya rayonında 2026-jılǵı awıl xojalıǵı máwsimine puqta tayarlıq kórilip atırǵanınan, tarawda sistemalı qatnas hám ámeliy qadaǵalaw kúsheytilip atırǵanınan derek beredi.
