Rásmiy múnásibet
Búgin Hoja.uz telegram kanalında Qaraqalpaqstan Respublikası Awıl xojalıǵı ministrligi málimleme xızmetiniń jumısına baylanıslı bildirgen “Sulayman ólip, dáwler qutıldı” (“Kelinler qozǵalanı” ózbek filminen) pikir-usınısları boyınsha tómendegilerdi málim etemiz.
Eń dáslep, Qaraqalpaqstan Respublikası Awıl xojalıǵı ministrligi Málimleme xızmeti ǵalaba xabar quralları hám blogerler menen ashıq, nızamlı hám óz-ara húrmetke tiykarlanǵan birge islesiwdi bárqulla tiykarǵı baǵdar dep biledi.
Bizge belgili, Ministrler Keńesiniń Málimleme xızmeti tárepinen 2026-jıl 6-yanvar kúni Qaraqalpaqstan Respublikası Ministrler Keńesiniń rásmiy veb-saytında barlıq málimleme xızmetleriniń 2026-jıl I-sherek media-rejeleri járiyalanǵan bolıp, olar 2019-jıl 27-iyundaǵı PQ-4366-sanlı qarar talaplarına tolıq sáykes keledi.
Sonı ayrıqsha atap ótiw kerek, Qaraqalpaqstan Respublikası Awıl xojalıǵı ministrligi Baspasóz xızmeti tárepinen 2025-jıl dawamında hár ayda keminde bir márte awıl xojalıǵı tarawına baylanıslı press-turlar shólkemlestirildi. Bul ilajlardıń bir neshesine Hoja.uz Telegram kanalı administratorı jeke telefon arqalı xabardar etildi, sonday-aq, rásmiy Telegram kanalı arqalı járiyalanǵannan keyin de usınıslar bir neshe márte individual túrde jetkerildi. Biraq, bul usınıslarǵa qaramastan, Hoja.uz Telegram kanalı administratorı túrli sebeplerdi keltirip, press-turlarda qatnaspadı. Sol sebepli, gezektegi ilajda usı kanal wákili ayrıqsha mirát etilmedi. Bul jaǵday tańlap shaqırıw yamasa “jasırın ilaj” ótkeriw sıpatında bahalanıwı tiykarsız.
Sonday-aq, press-turlar hám basqa da media ilajlarda qatnasıwdı qálegen barlıq bloger hám jurnalistler ushın Qaraqalpaqstan Respublikası Ministrler Keńesiniń rásmiy veb-saytında jaylastırılǵan media-rejeler ashıq hám hámmege birdey tiyisli.
Juwmaq ornında sonı málim etemiz, Qaraqalpaqstan Respublikası Awıl xojalıǵı ministrligi Málimleme xızmeti barlıq blogerler hám ǵalaba xabar quralları menen ashıq-aydın hám nızam sheńberinde birge islesiwge bárqulla tayar. Málimleme xızmetiniń jumısı nızam hújjetlerine muwapıq alıp barılmaqta hám bul baǵdarda bildirilgen hár bir tiykarlanǵan usınıslar turaqlı itibarǵa alınadı.
