“Awıl xojalıǵında jerden paydalanıw nátiyjeliligin arttırıw hám ónim jetistiriw kólemin kóbeytiw boyınsha qosımsha ilajlar haqqında”ǵı Prezident qararı (PQ-131-sanlı, 28.03.2025 j.) qabıl etildi.
️Qararǵa bola, barlıq túrdegi awıl xojalıǵına mólsherlengen jerlerdi ijaraǵa beriwde 2025-jıl 11-marttan tómendegi tártipler engiziledi:
elektron onlayn aukcion sawdasın ótkeriw haqqındaǵı xabardı járiyalaw múddeti 15 kúnnen 5 kúnge, qayta sawdalarda – 5 kúnnen 1 kúnge qısqartıladı;
qayta sawdalarda tek ǵana bir talabannan arza kelip túsken jaǵdayda, oǵan usı sawdalarda járiyalanǵan bahada lottı ıqtıyarıy satıp alıw usınıs etiledi;
hár qayta sawdada lot bahası 10 procentten basqıshpa-basqısh baslanǵısh bahasınıń 20 procentine shekem túsiriledi.
2025-jıl 1-aprelden aukcion sawdalarında jer uchastkasına ijara huqıqın alıw ushın tólemlerdi bólip-bólip tólew hám tólem tolıq tólengende shegirme beriw tártibi biykar etiledi, usı tólemler 15 jumıs kúni ishinde tolıq tóleniwi shárt ekenligi belgilendi.
️ 2025-2026-jıllarda aukcion sawdalarına shıǵarılatuǵın awıl xojalıǵına mólsherlengen jerler jámi maydanınıń ortasha 10-20 procenti sharwa ushın azıqlıq eginlerin egiw shárti menen sawdaǵa shıǵarıladı.
