RÁSMIY MÚNÁSIBET
Sociallıq tarmaqlarda puqara M.Xolniyazov tárepinen bildirilgen múrájáti boyınsha tómendegilerdi málim etemiz.
Bul múráját belgilengen tártipte Qaraqalpaqstan Respublikası Ministrler Keńesi tárepinen dúzilgen jumısshı topar hámde tiyisli ministrlikler menen mákemelerdiń qánigeleri qatnasında hár tárepleme úyrenip shıǵılǵan.
Úyreniw juwmaqlarına kóre, puqara M.Xolniyazov tárepinen toǵay xojalıǵı jer maydanınan ijara tiykarında paydalanılıp atırǵan 5,88 gektar jerdiń 1,0 gektar bóleginde miyweli baǵ jaratılǵanı hámde qalǵan maydanına másh egilgeni anıqlandı.
Sonday-aq, usı jer maydanları átirapında ayırım xojalıq júrgiziwshi subyektler tárepinen rejesiz salı egiliwi nátiyjesinde jer astı suwlarınıń kólemi kóterilip, baǵdaǵı ayırım miyweli terekler qurıp qalıwı hám másh egilgen maydanlarda izey suw kóterilgeni atap ótilgen.
Bul jaǵday boyınsha múráját iyesine ámeldegi nızamshılıq talapları tiykarında jetkerilgen materiallıq zıyandı óndiriw máselelerin sud tártibinde sheshiw múmkinligi, bunıń ushın tiyisli sud organlarına dawa arzası menen múráját etiw hámde zıyan muǵdarın tastıyıqlawshı hújjetler menen basqa da dáliyllerdi usınıw zárúrligi boyınsha huqıqıy túsindirmeler berilgen.
Bunnan tısqarı, «Suvxo‘jaliknazorat» inspekciyasınıń Qaraqalpaqstan Respublikası basqarması tárepinen jaǵday boyınsha tekseriw ótkerilip, rejesiz salı egip, suw resurslarınan ruxsatsız paydalanǵan xojalıq subyektlerine qarsı Ózbekstan Respublikası Suw kodeksiniń 164-statyası talapları tiykarında tiyisli ilajlar kórilgen hámde materiallar mazmunı boyınsha kórip shıǵıw ushın sud organına jiberilgen.
Qaraqalpaqstan Respublikası Awıl xojalıǵı ministrligi bul másele boyınsha ámeldegi nızamshılıq talapları tiykarında tiyisli wákillikli organlar tárepinen úyreniw jumısları alıp barılǵanın hámde múráját iyesiniń nızamlı máplerin qorǵaw maqsetinde sudqa múráját etiw huquqı bar ekenligi haqqında belgilengen tártipte túsindirme berilgenin málim etedi.
Qaraqalpaqstan Respublikası Awıl xojalıǵı ministrligi
Málimleme xızmeti
