Qaraózek rayonında ǵawasha tárbiyasına baǵıshlanǵan atız seminarı ótkerildi Qaraózek rayonında «Paxta jetistiriwde áhmiyetli 30 kúnlik» sheńberinde ǵawasha tárbiyasında agrotexnikalıq ilajlardı óz waqtında hám sapalı ámelge asırıw máselelerine baǵıshlanǵan atız seminarı shólkemlestirildi. Seminarǵa «Ózagroinspekciya»nıń Qaraqalpaqstan Respublikası basqarması baslıǵı E.Qayıpbergenov, Qaraqalpaqstan Respublikası Ósimlikler karantini hám qorǵaw agentligi baslıǵı Dj.Xudaybergenov, rayon hákimi A.Baymuratov, awıl xojalıǵı tarawı qánigeleri, fermer xojalıqları basshıları hám tiyisli shólkemlerdiń wákilleri qatnastı. Ilaj dawamında ǵawashanıń vegetaciya dáwirinde ámelge asırılıwı zárúr bolǵan agrotexnikalıq ilajlar, atap aytqanda, suwǵarıw, kultivaciya, azıqlandırıw, zıyankesler hám keselliklerge qarsı gúresiw hám de ósimliklerdi biologiyalıq hám ximiyalıq qorǵaw máseleleri boyınsha ámeliy usınıslar berildi. Sonday-aq, atız sharayatında ǵawashanı tárbiyalawda jol qoyılıwı múmkin bolǵan kemshilikler dodalanıp, ónimdarlıqtı asırıw hám sapalı paxta jetistiriw ushın agrotexnikalıq ilajlardı belgilengen múddetlerde orınlawdıń áhmiyetliligi atap ótildi.