Nókis rayonında shigit egiw jumısları jedel dawam etpekte

Nókis rayonındaǵı “Tolbay baslıq” fermer xojalıǵında 2026-jıl ónimi ushın shigit egiw jumısları shólkemleskenlik penen alıp barılmaqta.

Fermer xojalıǵında usı jılı 40 gektar jerge Shinjon usılında, plyonka astına shigit egiw rejelestirilgen bolıp, házirgi waqıtta egiw jumısları baslap jiberilgen.

Bul agrotexnikalıq usıl topıraqtıń ıǵallıǵın saqlaw, nállerdiń tez hám bir tegis ónip shıǵıwın támiyinlew jáne zúráátlilikti arttırıwda ayrıqsha áhmiyetke iye.

Sonday-aq, fermer xojalıǵında 2026-jıl ónimi ushın 10 gektar maydanǵa ǵálle egilgen.

Rayonda awıl xojalıǵı eginlerin jaylastırıw boyınsha belgilengen rejeler tiykarında usı jılı jámi 5500 gektar maydanǵa ǵálle egilgen bolsa, 1700 gektar maydanǵa paxta egiw rejelestirilgen.

Búgingi kúnde rayonda báhárgi atız jumısları shólkemleskenlik penen dawam etpekte hám fermer xojalıqları tárepinen agrotexnikalıq ilajlardı óz waqtında ámelge asırıwǵa ayrıqsha itibar qaratılmaqta.