Awıl xojalıǵında jańa bilim hám aldınǵı usıllar auditoriyada emes, kóbinese atız shetinde, zúráát jetistiriw sırların ámelde kórsete alatuǵın tájiriybeli diyqannıń jerinde jaqsı ózlestiriledi. Sonlıqtan sońǵı jılları mámleketimizde agrar reformalar sheńberinde fermerler arasında tájiriybe almasıw, ilimiy usınıslardı tikkeley óndiriske jetkeriw hám taraw wákilleriniń óz-ara birge islesiwin kúsheytiwge ayrıqsha itibar qaratılmaqta. Jer hám suw resurslarınan aqılǵa uǵras paydalanıw, topıraqtıń ónimdarlıǵın saqlap qalıw hám ekologiyalıq turaqlılıqtı támiyinlew máseleleri bolsa búgin hár bir fermer xojalıǵınıń aldında turǵan eń áhmiyetli wazıypalardan birine aylanǵan. Ásirese, suw tamtarıslıǵı sezilerli bolǵan Qaraqalpaqstan Respublikası sharayatında bul baǵdardaǵı hár bir ámeliy qádem zúráátlilik hám dáramatqa tikkeley tásir kórsetedi. Ámiwdárya rayonında awıl xojalıǵı tarawın bunnan bılay da rawajlandırıw, fermer xojalıqlarınıń jumıs nátiyjeliligin arttırıw, jer hám suw resurslarınan únemli paydalanıw, sonday-aq, aymaqlarda abadanlastırıw hám kóklemzarlastırıw jumısların keńeytiw maqsetinde «Aldınǵı fermerler klubı» shólkemlestirildi. Klubqa rayonda nátiyjeli jumıs alıp barıp atırǵan fermer xojalıqlarınıń basshıları aǵza bolıp, bul struktura olardıń arasında tájiriybe almasıw hám áhmiyetli máselelerdi birgelikte sheshiwdiń turaqlı maydanına aylanıwı názerde tutılǵan. Klub aǵzalarınıń qatnasıwında rayonnıń úsh aymaǵında kóshpeli seminarlar ótkerildi. Sonıń ishinde, Námuna aymaǵındaǵı «Muzaffar Eshchanov», Xolimbeg aymaǵındaǵı «Usta Allayar» hám Dúrman aymaǵındaǵı «Beshbaev Qurbangalı» fermer xojalıqlarınıń atızları bul retki shınıǵıwlar ushın ózine tán ámeliy maydanǵa aylandı. Ilajlarǵa klub aǵzaları hám taraw qánigeleri qatnasıp, seminarlardı rayonlıq Fermerler Keńesiniń juwapkerleri alıp bardı. Shınıǵıwlar tikkeley atız sharayatında shólkemlestirilgeni qatnasıwshılarǵa kórip shıǵılǵan máselelerdi tek teoriyalıq jaqtan emes, al anıq xojalıq mısalında, ámeliy tájiriybe tiykarında ańlaw imkaniyatın berdi. Seminarda eń dáslep atızlardı tazalaw hám abadanlastırıw jumıslarına itibar qaratıldı. Bizge belgili, jap hám kollektorlardıń boyların jabayı shópler hám shıǵındılardan tazalaw, atız jolları hám shetlerin tártipke keltiriw tek ǵana aymaqtıń kórinisin ózgertip qoymastan, al zıyankeslerdiń tarqalıwınıń aldın alıwda hám suwdıń egislik maydanlarǵa erkin jetip barıwın támiyinlewde de úlken áhmiyetke iye. Sonıń menen birge, «Jasıl mákan» ulıwma milliy joybarı sheńberinde fermer xojalıqlarına júklengen wazıypalar da tolıq kórip shıǵıldı. Atız átirapları hám jap boylarında jaratılatuǵın qorǵaw terekzarları egislik maydanların samal eroziyasınan qorǵap, topıraqtaǵı ıǵallıqtı saqlawǵa hám aymaqtaǵı ekologiyalıq jaǵdaydı jaqsılawǵa xızmet etetuǵının atap ótiw kerek. Ǵálle kútiniwi hám joqarı zúráátlilikke erisiw máseleleri seminardıń tiykarǵı temalarınan biri boldı. Gúzgi masaqlı dán eginlerin óz waqtında azıqlandırıw, suwǵarıw hám jabayı shóplerden qorǵaw sıyaqlı agrotexnikalıq ilajlardı belgilengen múddet hám normalarda ámelge asırıw kelesi jıl qırmanı ushın bekkem tiykar jaratatuǵını haqqında pikir alısıldı. Bunnan tısqarı, tákirarıy eginlerden alınǵan zúráátti muzlatqıshlı qoymaxanalarda saqlaw hám olardan nátiyjeli paydalanıw máseleleri tallandı. Ónimdi zamanagóy sharayatta saqlaw onı máwsimnen tısqarı dáwirde de bazarǵa shıǵarıw, bahalardıń turaqlılıǵın támiyinlew hám fermerdiń dáramatın arttırıwda áhmiyetli faktor ekeni ayrıqsha atap ótildi. Seminar dawamında Ózbekstan Respublikası Prezidentiniń 2025-jıl 31-oktyabrdegi «Xalıqtı azıq-awqat ónimleri menen turaqlı támiyinlewge baylanıslı qosımsha ilajlar haqqında»ǵı qararınıń orınlanıwı da hár tárepleme dodalandı. Hújjette belgilengen wazıypalardı óz waqtında hám sapalı orınlaw, bul baǵdarda fermer xojalıqlarına júklengen juwapkershilikti tereń ańlaw zárúrligi haqqında qatnasıwshılarǵa tolıq maǵlıwmat berildi. Seminarda ǵawasha paqalınan biochar, yaǵnıy biokómir tayarlaw máselesine de ayrıqsha itibar qaratıldı. Qatnasıwshılarǵa paxtashılıq shıǵındıların qayta islew hám olardan nátiyjeli paydalanıw imkaniyatları haqqında tolıq túsinikler berildi. Kóbinese atızda jaǵıp jiberiletuǵın yamasa paydalanılmay qalatuǵın ǵawasha paqalın arnawlı usılda qayta islew arqalı alınatuǵın biochar topıraqqa salınǵanda onıń strukturasın jaqsılap, ıǵallıq hám azıqlıq zatlardı uzaq saqlaw qásiyetin arttıratuǵının atap ótiw kerek. Usı jerde aytıw kerek, biochar arqalı topıraq ónimdarlıǵın arttırıw shorlanıwǵa beyim jerlerde ayrıqsha áhmiyetke iye. Bul usıl mineral tóginlerge bolǵan talaptı azaytıw, zúráátlilikti turaqlı arttırıw hám shıǵındısız óndiris principin awıl xojalıǵında keńnen engiziw imkaniyatın beredi. «Aldınǵı fermerler klubı» sheńberinde shólkemlestirilip atırǵan bunday seminarlar tájiriybeli xojalıqlardıń jumıs usılın basqalarǵa en jaydırıw, ilimiy tiykarlanǵan kózqaraslardı atızǵa alıp kiriw hám aymaqtı abadanlastırıw jumısların izbe-iz dawam ettiriwge xızmet etedi. Jerdi asrap, onnan aqılǵa uǵras paydalanıwdı úyrengen fermer bolsa tek ǵana óz xojalıǵınıń dáramatın arttırmay, al keleshek áwladlarǵa ónimdarlı topıraq hám jasıl tábiyattı miyras etip qaldıradı.