QANLÍKÓL RAYONÍNDAǴÍ “AGROHAMKOR CLUSTER” JSHJ ISKERLIGI BOYÍNSHA RÁSMIY MÚNÁSIBET
Sociallıq tarmaqlarda Qanlıkól rayonında jumıs alıp baratuǵın “AGROHAMKOR CLUSTER” JShJnıń fermer xojalıqları menen óz-ara esap-kitapları, elektron esap-fakturalardı rásmiylestiriw hám de paxta ónimlerin qabıllaw hám qayta islew menen baylanıslı jaǵdaylar boyınsha múrájat járiyalandı. Atap ót etuǵın bolsaq, bul múrájatta keltirilgen máseleler Qaraqalpaqstan Respublikası Awıl xojalıǵı ministrligi tárepinen úyrenildi.
Atalǵan jaǵdaylar boyınsha ministrlik tárepinen jumısshı topar dúzilip, 2026-jıl 9-noyabr kúni Qanlıkól rayonında orınǵa shıqqan halda úyreniw jumısları alıp barıldı. Processte kárxana iskerligi, usınılǵan hújjetler, elektron esap-fakturalar hám fermerler menen óz-ara esap-kitaplarǵa tiyisli máseleler kórip shıǵıldı.
Úyreniw dawamında ayırım hújjetler boyınsha qosımsha anıqlıq kirgiziw zárúrligi málim boldı. Atap aytqanda, fermer xojalıqları atına rásmiylestirilgen elektron esap-fakturalar, ónimlerdiń ámelde tapsırılıwı hám de óz-ara esap-kitaplar boyınsha tiyisli hújjetlerdi salıstırıw talap etiledi.
Usı menen birge, sociallıq tarmaqlarda járiyalanǵan múrájatta qaysı fermer xojalıqları tárepinen narazılıq bildirilgenligi anıq kórsetilmegen. Kárxana basshısı da múrájat etken fermerlerdiń atı hám narazılıqları anıq kórsetilgen jaǵdayda, tiyisli hújjetlerdi usınıwǵa tayınlıǵın bildirgen.
Aytıp ótiw orınlı, fermerler hám klaster arasındaǵı qarızdarlıq, aldı-berdi, ónim jetkerip beriw hám de shártnama májbúriyatlarınıń orınlanıwı menen baylanıslı dawlarǵa nızamshılıqta belgilengen tártipte huqıqtı qorǵaw organları hám sudlar tárepinen huqıqıy baha beriledi.
Awıl xojalıǵı ministrligi óz wákilligi sheńberindegi máselelerdi úyreniw hám tiyisli shólkemler menen sheriklik etiwge tayar.
Usı múnásibet penen jurnalist hám blogerlerden sociallıq tarmaqlarda múrájatlardı járiyalawdan aldın olardı hár tárepleme úyreniw, múrájat avtorların anıqlastırıw hám de barlıq mápdar táreplerdiń pikirin esapqa alıwların soraymız.
Ministrlik jurnalist hám blogerler menen ashıq sáwbetlesiw hám de sheriklikke hámiyshe tayar. Tarawǵa tiyisli máselelerdi biyǵárez hám haqıyqıy sáwlelendiriwde zárúr maǵlıwmatlardı usınıw boyınsha birge islesiwge tayar ekenligin bildiredi.
