KLIMAT ÓZGERIWINE SHIDAMLI AZIQLIQ EGINLER BOYINSHA TÁJIRIYBE JUMISLARI ALIP BARILMAQTA

📍 Xojeli rayonı Samankól APJ aymaǵında jaylasqan “Sobir ata” fermer xojalıǵı jer maydanlarında Aralboyı aymaǵınıń topıraq-klimat sharayatına sáykes, suw tamtarıslıǵına hám shorlanıwǵa shıdamlı azıqlıq egin sortların sınaqtan ótkeriw boyınsha tájiriybe jumısları alıp barılmaqta.

Bul tájiriybeler Xojeli, Taqıyatas hám Nókis rayonları Agro xızmetler orayınıń qánigesi Sh. Kamalov hám Sharwashılıq hám qusshılıq ilimiy-izertlew institutınıń kishi ilimiy xızmetkeri Farxod Qo‘chqorov penen birgelikte shólkemlestirildi.

Tájiriybe maydanlarında institut ilimpazları tárepinen jaratılǵan qashqarbedeniń “Qıbray”, qara biydaydıń “Shalola”, sulınıń “Ózbekstan keń japıraqlı”, tritikaleniń “Gúmis tárizli prag” sortları hám basqa da perspektivalı azıqlıq eginlerdiń hár qıylı sort hám úlgileri sınaq túrinde egilgen.

Sonday-aq, eginlerdiń ónip shıǵıwı hám rawajlanıwına túrli biopreparatlar, organikalıq tóginler, mikoriza jáne gidrogellerdiń tásirin úyreniw boyınsha tájiriybeler ámelge asırılmaqta.

Tájiriybelerden tiykarǵı maqset Aralboyı aymaǵınıń quramalı topıraq-klimat sharayatında jetistiriwge sáykes, suw tamtarıslıǵına hám shorlanıwǵa shıdamlı azıqlıq egin sortların anıqlaw, olardı kóbeytiw jáne sharwashılıq ushın bekkem azıqlıq bazasın jaratıwǵa qaratılǵan.

Bul ilimiy-ámeliy tájiriybeler keleshekte Aralboyı aymaǵında azıqlıq eginlerdi jetistiriw nátiyjeliligin arttırıw hám ekologiyalıq turaqlılıqtı támiyinlewge xızmet etedi.