Xojeli rayonı “Mustaqillik” awıl puqaralar jıyını aymaǵında jasawshı Xudaybergenov Xalmurat pal hárreshilik tarawında óziniń shańaraqlıq biznesin jolǵa qoyıp, búgingi kúnde kóplegen jaslarǵa órnek bolıp atır.

Dáslep jumıssızlıǵı sebepli isbilermenlik penen shuǵıllanıwǵa qarar etken Xalmurat aǵa kredit qarjıları esabınan 16 pal hárre shańaraǵın satıp alıp, jumısın baslaǵan. Tınımsız miynet hám izleniwler nátiyjesinde búgingi kúnde pal hárre shańaraqlarınıń sanın 120 ǵa jetkeriwge eristi.

Itibarlısı, isbilermen tek ǵana óz jumısın keńeytip qoymastan, al basqalarǵa da kásip úyretpekte. Házirgi waqıtta onıń Xojeli, Kegeyli hám Nókis rayonlarında shákirtleri bar.

Sonday-aq, Xalmurat aǵa máhálledegi hákim járdemshisi menen birgelikte puqaralarǵa pal hárre shańaraqların jetkerip beriw hám jańa pal hárreshilerdi tayarlaw jumısların da jolǵa qoyǵan.

🎙 «Búgingi kúnde isbilermenlikti baslaw ushın imkaniyatlar júdá kóp. Ásirese, jaslarımız jaratılıp atırǵan sharayatlardan nátiyjeli paydalanıp, óz biznesin jolǵa qoyıwı kerek», — deydi tájiriybeli pal hárreshi.

✅ Haqıyqatında da, búgingi kúnde Qaraqalpaqstanda isbilermenlikti rawajlandırıw, xalıqtıń bántligin támiyinlew hám jańa jumıs orınların jaratıw maqsetinde jeńilletilgen kredit baǵdarlamaları ámelge asırılmaqta. Sonıń ishinde, Qaraqalpaqstan xalqı ushın 12 procentlik jeńilletilgen kredit imkaniyatları da názerde tutılǵan.

Xalmurat aǵanıń jumısı — jaratılıp atırǵan imkaniyatlardan aqılǵa uǵras paydalanıp, ápiwayı jumıstı dáramatlı shańaraqlıq bizneske aylandırıw múmkin ekenliginiń ayqın úlgisi bolıp tabıladı.