Taqıyatastaǵı paxta terimi: sociallıq tarmaqlarda tarqalǵan xabarlarǵa túsinik berildi
🌐Sociallıq tarmaqlarda Taqıyatas rayonındaǵı paxta atızlarınan birinde terim pulları keshiktirilip atırǵanı hám terimshiler azıq-awqat penen támiyinlenbegeni haqqında videokórinis tarqaldı. Bul jaǵday boyınsha “Surxon Taxiatosh” JShJ basshısı menen baylanısıp, jaǵdayǵa anıqlıq kirgizildi.
📍 Málim bolıwınsha, waqıya Taqıyatas rayonı Naymankól APJ aymaǵında jaylasqan kárxana paxta atızında júz bergen. Usı jıldıń 17-oktyabr kúni azanǵı saat 09:00 de baslanǵan terim procesine 1 500 kewilli terimshi qatnasqan.
📋 Terimshiler sanınıń kópligi sebepli terilgen paxtanı tárezide ólshew, qabıllaw hám esap-sanaq jumıslarına ádettegiden kóbirek waqıt ketken. Saat 15:00 den baslanǵan ólshew processleri dawamında saat 18:00 ge shekem 1 200 terimshiniń paxta haqısı tólep berilgen.
ℹ️Qalǵan 300 terimshiniń qarjıları da olardıń toparlarına juwapker bolǵan úsh wákilge tapsırılǵan. Bul qarjılardı topar basshıları hár bir terimshige tarqatıw procesi waqıt talap etkeni sebepli ayırım puqaralar kútiwge májbúr bolǵan. Nátiyjede júzege kelgen narazılıq videokórinis arqalı sociallıq tarmaqlarda tarqalǵan.
✅Terimshiler azıq-awqat penen támiyinlengen
📌Videokóriniste bildirilgen narazılıqlardan jáne biri azıq-awqat máselesine baylanıslı. Kárxana basshısınıń málim etiwinshe, terimshilerge ishimlik suwı menen birge bir mártelik ıdıstaǵı tayar azıq-awqat ónimleri jetkerip berilgen. Demek, kárxana tárepinen terimshilerdi azıq-awqat penen támiyinlew ilajları kórilgen.
🚌 Sonday-aq, terimshilerdi atızǵa alıp keliw ushın transport xızmeti shólkemlestirilgen. Bunnan tısqarı, kárxana basshısınıń málim etiwinshe, topar juwapkerleri kárxana wákillerinen 400 ge shamalas terimshiniń hár biri ushın 5 mıń sumnan beriwdi talap etken hám bul qarjı kárxana tárepinen berilgen.
📋 Ulıwma alǵanda, kárxana basshısı bergen maǵlıwmatlarǵa bola, terimshilerdiń paxta haqısı esap-sanaq procesi dawamında basqıshpa-basqısh tólengen, azıq-awqat hám ishimlik suwı menen támiyinlew jumısları da shólkemlestirilgen.
🤝Paxta jıynaw-teriw máwsiminde bunday jaǵdaylardıń aldın alıw ushın esap-sanaqlardı jedel shólkemlestiriw, topar juwapkerleri hám terimshiler arasında anıq túsindiriw jumısların alıp barıw áhmiyetli. Sebebi, júzege kelgen waqtınsha keshigiwler sebepli túsinbewshilikler payda bolmawı, terimshilerdiń miyneti múnásip qádirleniwi hám xabarlar sociallıq tarmaqlarda tarqalıwınan aldın jaǵdayǵa tolıq anıqlıq kirgiziliwi tiyis.
